کودەتاکەی پۆلیڤیا و کاردانەوەی وڵاتان

ئاڤا نیوز 

دوای کودەتا سەربازییەکەی پۆلیڤیا، ئەمریکا و یەکێتی ئەوروپا  لەسەر دۆخەکە هاتنە دەنگ.

وێنە گەورەکە: کودەتا سەربازییەکەی پۆلیڤیا، کاردانەوەی وڵاتانی بەدوای خۆیدا هێنا و چاوی جیهانی خستە سەر ئەو وڵاتە، بەگوتەی بەرپرسێکی باڵای ئەمریکی، کۆشکی سپی لە نزیکەوە چاودێری دۆخی وڵاتەکە دەکات.  

چی ڕوویدا: درەنگانی دوێنێ شەو، لەلایەن چەند فەرماندەیەکی باڵای سەربازیی پۆلیڤیاوە جوڵە بە یەکە سەربازییەکان کرا و  هێرش کرایە سەر کۆشکی سەرۆکایەتی ئەو وڵاتە  و هۆشداری "کودەتا" درا، بەڵام هەوڵەکە شکستی هێنا.

کاردانەوەکان: جۆزێپ بۆرێل، نوێنەری باڵای یەکێتی ئەوروپا بۆ کاروباری دەرەوە لە ئێکس نووسیویەتی: "هەر هەوڵێک بۆ تێکدانی سیستەمی دەستووری لە پۆلیڤیا و ڕووخاندنی حکومەتی هەڵبژێردراوی دیموکراسی سەركۆنە دەکەین".

لویز ئیناسیۆ لولا دا سیلڤا، سەرۆکی بەڕازیل سەركۆنەی"کودەتای سەربازی" لە پۆلیڤیا کرد و پشتیوانی تەواوی لویس ئارسی سەرۆکی پۆلیڤیای کرد.

پێدرۆ سانچێز، سەرۆکوەزیرانی ئیسپانیا سەركۆنەی "کودەتای سەربازی" لە بۆلیڤیا کرد و داوای ڕێزگرتن لە دیموکراسی و سەروەری یاسا دەکات.

باکگراوند: پۆلیڤیا دەکەوێتە ناوەڕاستی ئەمریکای باشوور، پایتەختەکەی لاپازە و سنووری لەگەڵ وڵاتی پیرۆ هەیە و ژمارەی دانیشتووانی 12 ملیۆن و 567 هەزار کەسە، سیستمی دەسەڵاتەکەی کۆمارییە.