ئاڤا نیوز ناوی قایمقامی خورماڵ ئاشكرا دەكات

ئاڤا نیوز

یەکەم قایمقام بۆ قەزای خورماڵ دیاری دەکرێت و داواکارییەکانی خەڵکی دەڤەرەکەش جێبەجێ دەکرێن.

وێنە گەورەکە: ئامادەکارییەکان بۆ ڕاگەیاندنی قایمقامیەتی خورماڵ بەردەوامن، قایمقام لە نزیکترین کاتدا دەسبەکار دەبێت و سەرجەم یەکە ئیدارییەکانیشی بۆ پێکدەهێنرێن.

زانیاریی بەدەستهاتوو: بەپێی ئەو زانیاریانەی دەست ئاڤا نیوز کەوتوون، فەرەیدون مەحموود، بەڕێوەبەری ناحیەی خورماڵ بۆ ماوەی ساڵێک دەبێتە قایمقامی بەوەکالەتی قەزاکە، تا ئەو کاتەی بەتەواوەتی یەکە ئیدارییەکانی قەزاکە پێکدەهێنرێن و ڕادەگەیێنرێن.

ئەوەی پێویستە بیزانیت: فەرەیدون مەحموود ڕەسووڵ خەڵکی پێنجوێنە، بڕوانامەی بەکالۆریۆسی لە یاسادا هەیە و خێزاندارە.

ئەمەش بزانە: سەرۆکی شارەوانی خورماڵ و سەرجەم بەرپرسە ئیدارییەکانی ناوچەکە لە پۆستەکانیان دەمێننەوە.

بۆچی گرنگە: بڕیاری بەقەزابوونی خورماڵ کە دوای سەردانی سەرۆکوەزیران بارزانی لە شووباتی ئەمساڵ درا، گرنگییەکی زۆری بۆ خەڵکی دەڤەرەکە هەیە لەڕووی ئیدارییەوە و ناوچەکە فراوانتر دەکات بۆ کاری ڕۆژانە و ڕۆتیناتی ئیداری کەم دەکاتەوە.