سوودانی: هەرێمی کوردستان بەشێکە لە دانوستانەکانی کۆتاییهێنان بە ئەرکی هاوپەیمانان

ئاڤا دیجیتاڵ

 

سەرۆکوەزیرانی عێراق ئاشکرای دەکات کە هەرێمی کوردستانیش بەشێکە لە دانوستاندنەکانی کۆتاییهێنان بە ئەرکی هێزەکانی هاوپەیمانیی نێودەوڵەتی دژی داعش لە عێراق.

 

وێنە گەورەکە: لەگەڵ زیاتر تەشەنەسەندنی ئاڵۆزییەکان لە ڕۆژهەڵاتی ناوەڕاست زیاتر لە هەرکاتێک پرسی کشانەوەی هێزەکانی ئەمریکا گفتوگۆی لەسەر دەکرێت، لەکاتێکدا لە ئەرکدان بۆ ڕاهێنان و ڕاوێژدان بە پێشمەرگە و هێزە ئەمنییەکانی عێراق. 

 

لێدوانی فەرمی: محەمەد شیاع سوودانی، سەرۆکوەزیرانی عێراق ڕایگەیاند: گەیشتووینەتە هاوکێشەیەک کە گرووپە چەکدارەکان هێرشەکانیان ڕابگرن و لەبەرامبەریشدا ئەمریکا وەڵام نەداتەوە، کۆتاییهێنان بە ئەرکی هاوپەیمانیی نێودەوڵەتی دژی داعش بۆ ئەوەیە هیچ پاساوێک بەدەستەوە نەدرێت بۆ هێرشکردنە سەر ڕاوێژکارەکانی، هەر هێرشێکی سەربازیش لەنێو خاکی عێراق هەر لایەنێک بیکات ڕەتی دەکەینەوە.

 

بابەتی ستراتیژی: هاوپەیمانی نێودەوڵەتی لەسەر داوای بەغدا لە عێراق دەستی بە کارکردنی کردووە، هەر لەسەر "داوای عێراق کۆتاییش بە ئەرکەکەی دێت"، هەروەها هەرێمی کوردستان بەشێکە لە دانوستاندنەکانی کۆتاییهێنان بە ئەرکی هێزەکانی هاوپەیمانیی نێودەوڵەتی دژی داعش لە عێراق.