سەرۆک بارزانی بۆ تاوتوێکردنی چەند پرسێک سەردانی بەغدا دەکات

ئاڤا نیوز

سەرۆک بارزانی سەردانی بەغدا دەکات و سەرکردەی زۆربەی لایەنە سیاسییەکانی عێراق دەبینێت، بەشداری کۆبوونەوەی چوارچێوەی هەماهەنگی دەکات و چەند پرسێکی گرنگیان لەگەڵ تاوتوێ دەکات.

وێنە گەورەکە: چەندین پرس لە عێراق و هەرێمی کوردستان تائێستا بە چارەسەرنەکراوی ماونەتەوە، سەرۆک بارزانی لەسەر بانگهێشتی سەرۆکوەزیرانی عێراق و سەرکردەی لایەنە سیاسییەکان، بۆ چارەسەری ئەو پرسانە دوای شەش ساڵ سەردانی بەغدا دەکات.

زانیاریی بەدەستهاتوو: بەگوتەی سەرچاوەیەک لە نووسینگەی عەممار حەکیم، سەرۆکی ڕەوتی نیشتمانی حیکمە، سبەی چوارشەممە سەرۆک بارزانی سەردانی بەغدا دەکات، لە ماڵی عەممار حەکیم بەشداری کۆبوونەوەی چوارچێوەی هەماهەنگی دەکات و بەشێکی زۆری سەرکردەکانی عێراق دەبینێت.

 

ئەوەی پێویستە بیزانیت: کێشەکانی نێوان هەولێر و بەغدا، خاڵەکانی پێکهێنانی هاوپەیمانیی ئیدارەی دەوڵەت، پرسی مووچە، دەستپێکردنەوەی هەناردەی نەوت، هەڵبژاردنی خولی شەشەمی پەرلەمانی کوردستان و هەڵبژاردنی داهاتووی عێراق و پرسە ئەمنییەکانی ناوچە کوردستانییەکانی دەرەوەی ئیدارەی هەرێمی کوردستان  گفتوگۆیان لەسەر دەکرێت.

زانیاریی زیاتر: تەوەرێکی دیکەی کۆبوونەوەکانی سەرۆک بارزانی، پۆستی سەرۆکی پەرلەمانی عێراق دەبێت، جگە لە یاسای نەوت و غاز و یەکلاکردنەوەی پرسی پارێزگارێک بۆ کەرکووک و پێکهێنانی ئەنجوومەنی باڵای فیدراڵی عێراق.