نێچیرڤان بارزانی: هیچ بەڵگەیەک نییە یەکێتی لەپشت سووتاندنی بازاڕەکان بووبێت

ئاڤا نیوز

 

سەرۆکی هەرێمی کوردستان ڕایگەیاند، هیچ بەڵگەیەک نییە بڵێت یەکێتی وەک حیزب لە پشت ڕووداوی ئاگرکەوتنەوەکانی هەولێر و کەرکووک بووە.

 

وێنە گەورەکە: ڕۆژی 1-7-2024، نێچیرڤان بارزانی سەرۆکی هەرێمی کوردستان بە سەردانێک گەیشتە نەمسا، ئەمڕۆ لەگەڵ سەرۆککۆمار و وەزیری دەرەوەی ئەو وڵاتە کۆبووەوە.

 

لێدوانی فەرمی: نێچیرڤان بارزانی، سەرۆکی هەرێمی کوردستان ڕایگەیاند: نەمسا خوازیاری بەرەوپێشچوونی پەیوەندییە ئابووریی و سیاسییەکانیەتی لەگەڵ هەرێمی کوردستان و عێراق، داوامان لێکردن کۆنسوڵخانەی نەمسا لە هەولێر بکەنەوە.

 

خاڵی ئەرێنی: ئێستا پەیوەندی نێوان هەرێمی کوردستان و عێراق لە ئاستێکی باشە، لە هەوڵداین بۆ چارەسەرکردنی کێشەکانی نێوانمان، بەغداش بە هەمان شێوەیە مامەڵە دەکات، ئێستا بە ئاراستەی چارەسەرکردنی ئەو گرفتانەین کە پەیوەندییان بە ژیان و گوزەرانی خەڵکەوە هەیە.

 

گۆشەیەکی دیکە: نێچیرڤان بارزانی ئەوەشی گوت، بەڕوونی باس لەوە کرا پەکەکە لە پشت ڕووداوی سووتانی بازاڕەکانی هەرێمی کوردستانە، ئەوەش دەرئەنجامی لێکۆڵینەوەی هاوبەشی نێوان دەزگا ئەمنییەکانی هەرێمی کوردستان و عێراقە، هیچ بەڵگەیەکیش نییە تاوەکو بڵێت یەکێتی وەک حیزب لەپشتی ئەم کردەوانە بووە، ڕەنگە ئەوانە ئەندامی ئەو حیزبە بن، یان پێشتر لەگەڵیان بووبن".