سەرۆک بارزانی ئەمڕۆ دەچێتە بەغدا

ئاڤا نیوز

سەرۆک بارزانی دەچێتە بەغدا  و بەمەبەستی چارەسەکردنی کێشەکانی نێوان هەرێمی کوردستان و حکومەتی فیدراڵ زنجیرەیەک کۆبوونەوە  لەگەڵ سەرکردە سیاسییەکانی عێراق دەکات.

وێنە گەورەکە: دوای شەش ساڵ سەرۆک بارزانی سەردانی بەغدا دەکات و کاتژمێر 11:00ی پێشنیوەڕۆی ئەمڕۆ دەگاتە فڕۆکەخانەی پایتەخت، لە ماوەی دوو ڕۆژدا زنجیرەیەک کۆبوونەوەی لەگەڵ بەرپرسانی باڵای عێراق دەبێت.

ڕاگەیێنراوی فەرمی: بارەگای بارزانی  باسی لەوە کردووە "سەرۆک مەسعود بارزانی بەمەبەستی ئەنجامدانی زنجیرەیەک کۆبوونەوە لەگەڵ لایەنە فەرمی و سیاسییەکانی عێراق سەردانی شاری بەغدا دەکات."

زانیاریی بەدەستهاتوو: ڕۆکان مەحموود، نێردراوی ئاڤا لە بەغدا گوتی، "سەرۆک بارزانی یەکەم کۆبوونەوەی لەگەڵ محەممەد شیاع سوودانی، سەرۆکوەزیرانی عێراق دەبێت، دواتر لەگەڵ هاوپەیمانی ئیدارەی دەوڵەت کۆدەبێتەوە، سێیەم کۆبوونەوەی لە ماڵی عەمار حەکیم و لەگەڵ لایەنەکانی چوارچێوەی هەماهەنگی دەبێت".

زانیاریی زیاتر:  سەرۆک بارزانی سبەی پێنجشەممە سێ کۆبوونەوەی دیکە دەکات، کۆبوونەوەی یەکەم لەگەڵ خەمیس خەنجەر، کۆبونەوەی دووەم لەگەڵ فایەق زێدان، سەرۆکی ئەنجومەنی دادوەری  و کۆبوونەوەی سێیەم لەگەڵ محەممەد حەلبووسی، سەرۆکی هاوپەیمانی تەقەدوم دەبێت.