ڕەوتی حیکمە: هەڵبژاردنی پێشوەختەی عێراق کۆدەنگیی لەسەر نییە

ئاڤا نیوز

پرسی هەڵبژاردنەکانی هەرێمی کوردستان و عێراق، یەکێک لە تەوەرەکانی گفتوگۆی سەرۆک بارزانی و لایەنە سیاسییەکان دەبێت، کە ئەمڕۆ لە ماڵی عەممار حەکیم لە بەغدا دەکرێت. بەرپرسێکی ڕەوتی حیکمە دەڵێت "هەڵبژاردنی پێشوەختە کۆدەنگیی لەسەر نییە".

وێنە گەورەکە: سەرۆک بارزانی لەسەر بانگهێشتی سەرۆکوەزیرانی عێراق و سەرکردەی لایەنە سیاسییەکانی عێراق دوای شەش ساڵ جارێکی دیکە چووە بەغدا بۆ تاوتوێکردنی چەندین پرسی تایبەت بە عێراق و پەیوەندییەکانی بەغدا و هەولێر. لە ماوەی دوو ڕۆژدا لەگەڵ بەرپرسانی حکومەت و لایەنە سیاسییەکانی عێراق کۆبوونەوەی فراوانی دەبێت.

لێدوانی فەرمی: فەهد جبووری، ئەندامی دەستەی گشتیی ڕەوتی حیکمە بە ئاڤا نیوزی ڕاگەیاند؛ کۆبوونەوەی لایەنە سیاسییەکان لەگەڵ سەرۆک بارزانی بۆ تاوتوێکردنی کۆی پرس و کێشەکانی عێراقە، کە سەرکردەکانی چوارچێوەی هەماهەنگی بەشدار دەبن.

ئەوەی پێویستە بیزانیت: نووری مالیکی، سەرۆکی هاوپەیمانیی دەوڵەتی یاسا لە ڕۆژانی ڕابردوودا ڕایگەیاند، عێراق پێویستی بە هەڵبژاردنی پێشوەختەیە و پاڵپشتیی خۆی بۆ ئەو هەڵبژاردنە دەربڕی، کە لە کۆتایی ساڵی2024 بکرێت.

 

ئەوەی لەو بارەیەوە دەگوترێت: بابەتی هەڵبژاردنی پێشوەختەی پەرلەمانی عێراق دەستپێشخەریی هاوپەیمانیی دەوڵەتی یاسایە. فەهد جبووری دەڵێت: "بە فەرمی داواکارییەکی لەو شێوەیە پێشکەشی هێزەکانی چوارچێوەی هەماهەنگی نەکراوە و هیچ هۆکارێکیش بۆ ئەنجامدانی نییە".

لەلایەکی دیکەوە: لە چوارچێوەی کارنامەی محەممەد شیاع سوودانی بۆ پێکهێنانی حکومەت، هەڵبژاردنی پێشوەختە یەکێکە لە خاڵەکان، ئەگەر وڵات کەوتە قەیرانی سیاسی.

ئەمەش بزانە: سەردانەکەی سەرۆک بارزانی بۆ بەغدا لە کاتێکدایە بەشێکی زۆری تێبینییەکانی پارتی لەبارەی هەڵبژاردنی پەرلەمانی کوردستان لەبەرچاو گیراوە و چارەسەر کراون، لەوانەش چارەسەرکردنی پەنجەمۆری دەنگدەران و گەڕانەوەی بەشێک لە کورسیی پێکهاتەکان.