ناسنامە و وردەکاریی دەستگیرکردنی نۆ چەکداری داعش لەلایەن ئاسایش

ئاڤا نیوز

 

بەڕێوەبەرایەتیی گشتیی ئۆپەراسیۆنەکانی ئاسایش لە دوو ناوچەی جیاواز، نۆ چەکداری گروپی "داعش"یان دەستگیر کرد.

 

وێنە گەورەکە: ئەگەرچی چالاکییەکانی چەکدارانی "داعش" لە عێراق و هەرێمی کوردستان لاواز بووە، بەڵام هێزەکانی ئاسایش بەردەوام بە شوێن پاشماوەی ئەو گرووپەن.

 

لێدوانی فەرمی: عەقید سەلام عەبدولخاڵق، گوتەبێژی دەزگای ئاسایشی هەرێم بە ئاڤا نیوزی گوت: ئەو نۆ چەکدارەی داعش لەلایەن دەزگا ئەمنییەکانی عێراق داواکراو بوون، لە تورکیاوە گەڕابوونەوە و سەرقاڵی خۆڕێکخستنەوە بوون بۆ کردەوەی تیرۆرستی.

 

زانیاریی زیاتر: عەقید سەلام عەبدولخاڵق ئەوەشی بە ئاڤا گوت، ئەو چەکدارانە لە سلێمانی، چەمچەماڵ، تەق تەق و ناحیەی شوان لە دوو ئۆپەراسیۆنی جیاوازدا دەستگیرکراون.

 

ئەوەی پێویستە بیزانیت: ئەو چەکدارانە تەمەنیان لەسەرووی 30 ساڵییە و خەڵکی ناوچەکانی ناوەڕاست و خوارووی عێراقن. تۆمەتبارن بە بەشداریکردن لە چەندین کاری تیرۆریستی و بەپێی ماددەی چواری تیرۆر لە هەرێمی کوردستان دەستگیر کراون.