کێڵگە نەوتییەکان وەک مەترسییەک لەسەر دانیشتووانی عێراق

ئاڤا نیوز 

کێڵگە نەوتییەکان ڕۆڵیان لە پیسکردنی ژینگە هەیە و کاریگەریی خراپ لەسەر تەندروستیی مرۆڤ جێدەهێڵن، بەوهۆیەشەوە وەک مەترسییەک بۆ سەر دانیشتووانی عێراق سەیر دەکرێن.

وێنە گەورەکە: بە هەزاران کۆمپانیای خۆماڵی و بیانی لە کەرتی نەوتدا لە عێراق وەبەرهێنان دەکەن، پابەند نەبوونیان بە پێوەرەکانی ژینگە و سەلامەتی، بوونەتە هۆکاری پیسبوونی ژینگە و مەترسییان بۆ سەر هاووڵاتیان دروستکردووە.

لێدوانی فەرمی: سائیر یوسف، شارەزا لەبواری ژینگە بە ڕۆژنامەی "سەباح"ی ڕاگەیاند: "زیادەڕەوی لەبەرامبەر خاک، هەوا و ئاو بەردەوامە و لە دەرئەنجامدا ژینگە پیس دەکات و بیرە نەوتییەکانیش ڕۆڵیان لەمبارەیەوە نەرێنییە".

هۆکارە زانراوەکان: دەردانی گازە زیانبەخشەکانی و پابەند نەبوونی کۆمپانیا نەوتییەکان بە پێوەرەکانی سەلامەتیی ژینگە هۆکاری سەرەکیی پیسبوونی ژینگەن لە عێراق.

درێژەی ڕاپۆرت...

بوونی پێوەرە جیهانییەکانی سەلامەتیی ژینگە و نەبوونی یاسا

عاسم جیهاد، گوتەبێژی وەزارەتی نەوتی عێراق ڕایگەیاند: "سەرجەم کۆمپانییەکانی نەوتی کارکەر لە عێراق بەپێی ناوەڕۆکی گرێبەستەکانیان بەگوێرەی پێوەرە جیهانییەکانی ژینگە و سەلامەتی کار دەکەن".
لە بەرامبەردا سائیر یوسف پێیوایە زۆربەی بیرە نەوتییەکان کەمتەرخەمن لە ڕەچاوکردنی بارودۆخی کشتوکاڵی، ڕێنمایی ژینگەیی، تاوەکو ئێستاش یاسایەکی ژینگەیی لەمبارەیەوە نییە هۆکارەکانی پیسبوونی ژینگە سنووردار و لێپێچینەوە لەمبارەیەوە بکات، بەڵام تاوەکو ئێستا یاسایەک نییە تاوەکو ڕێگری لە هۆکارەکانی پیسبوونی ژینگە بکات و لێپێچینەوە لەگەڵ سەرپێچیکاران بکات".

بودجەیەکی زەبەلاح بەڵام بێ سوود
بە پێی زانیارییەکانی جاسم فەلاحی، بریکاری وەزارەتی ژینگەی عێراق، حکومەت 90 ملیار دیناری لە پێناو ڕووبەڕووبوونەوەی مەترسیی گۆڕانی کەشوهەوا و چارەسەری پیسبوونی هەوا تەرخان کردووە. بەڵام نەیتوانیوە مەترسییەکانی پیسبوونی ژینگە کەمبکاتەوە کە بە گوێرەی ڕاپۆرتێکی دامەزراوەییCEOWORLD ی ئەمریکی، عێراق دووەم پیسترین هەوای لە جیهاندا هەیە و لە کاتێکدا لە ساڵی 2020 و 2021 لە ڕیزبەندی دەیەمی جیهانی بوو لە پیسبوونی هەوا، بەڵام لە ماوەی چەند ساڵێکدا بووە یەکێک لە پیسترین وڵات لە رووی ژینگە و هەوای پاکەوە. 

جەنگ و پیسبوونی ژینگە لە عێراق
یەکێکی دیکە لە هۆکارەکانی پیسبوونی ژینگە، جەنگە یەک لەدوا یەکەکانی عێراقە کە ڕۆڵێکی سەرەکییان لە پیسبوونی ژینگە و زۆربوونی نەخۆشییەکان هەبووە.

بەپێی ڕاپۆرتێکی بانکی نێودەوڵەتی لەسەر هەڵسەنگاندنی زیان و پێداویستییەکانی پارێزگا زەرەرمەندەکانی جەنگ لە عێراق، 47٪ دارستانە سرووشتییەکانی عێراق بەهۆی جەنگەوە لەناوچوونە و 24 هەزار کیلۆمەتر دووجای خاکی عێراق بەهۆی مینەوە ناتوانرێت بەکاربهێنرێت.