بەهۆی هێرشی ئەمریکا سەرجەم ڕێگاکانی ناوچەی سەوزی بەغدا داخران

ئاڤا دیجیتاڵ

بەهۆی هێرشی ئەمشەوی ئەمریکا بۆ سەر بەغدا و خۆپێشاندانی لایەنگرانی حەشدی شەعبی، سەرجەم ڕێگاکانی ناوچەی سەوزی بەغدا داخران.

چیرۆكی سەرەكی: لە درێژەی کاردانەوەکانی ئەمریکا وەک تۆڵەی کوژرانی سێ سەربازەکەیان لە ئوردن، ئەمشەو  بە درۆن ئۆتۆمبێلێکی حەشدی شەعبی لە بەغدا کردە ئامانج و بەهۆیەوە دوو سەرکردەی کەتائیبی حیزبوڵڵای حەشدی شەعبی  و دوو چەکدار کوژران.

ڕاستەوخۆ دوای هێرشەكە سەدان لایەنگری حەشدی شەعبی لە شوێنی تەقینەوەكە دەستیان بە خۆپێشاندان کرد و دواتر بە گوتنەوەی دروشم دژی هێزەكانی ئەمریكا بەرەو باڵیۆزخانەی وڵاتەکە ڕۆشتن، بەوهۆیەشەوە رێككاری ئەمنیی تووند گیرایەبەر و سەرجەم ڕێگاکانی چوونە نێو ناوچەی سەوزی بەغدا داخران.

 

لێدوانی فەرمی: فالح فەییاز، بەرپرسی دەستەی حەشدی شەعبی ڕایگەیاند؛ "بەئامانجگرتنی حەشدی شەعبی یاریكردنە بە ئاگر".

باكگراوند: هێرشەکە لەکاتێکدایە چەند ڕۆژێک پێش ئێستاش ئەمریکا 85 بنکە و بارەگای گرووپە چەکدارەکانی نزیک لە ئێرانی لە سووریا و عێراق بۆردوومان کرد و بەهۆیەوە دەیان چەکدار کوژران و بریندار بوون.