لایەنە سیاسییەکانی هەرێمی کوردستان: گەشبینین پزیشکیان پەیوەندییەکانی هەولێر و تاران باشتر بکات

ئاڤا نیوز

 

پارت و لایەنە سیاسییەکانی هەرێمی کوردستان بۆچوونی جیایان بەرامبەر مەسعود پزیشکیان، سەرۆککۆماری تازە هەڵبژێردراوی ئێران لە سیاسەتی نێوخۆیی و ناوچەیی هەیە.

 

وێنە گەورەکە: دوای کەوتنەخوارەوەی هێلیکۆپتەرەکەی ئیبراهیم ڕەئیسی، سەرۆککۆماری پێشووی ئێران هەڵبژاردنی پێشوەختە لەو وڵاتە کرا و لە گەڕی دووەمی هەڵبژاردنەکەدا مەسعود پزیشکیانی ڕیفۆرمخواز زۆرترین دەنگی بەدەست هێنا.

 

بۆچی گرنگە: ئێران بۆ هەرێمی کوردستان وڵات و دراوسێیەکی گرنگە و لە ڕووی ئابووری و کولتوورییەوە پەیوەندییەکی لەمێژینەیان هەیە، لەگەڵ ئەوەشدا ڕۆڵ و کاریگەریی ئێران لەسەر حزب و هاوپەیمانییە عێراقییەکان بنەمایەکی گرنگە بۆ بەرەوپێشچوونی سیاسەت و گەشەسەندنی هەرێمی کوردستان. 

 

لێدوانە فەرمییەکان: چاوەڕوانی لایەنە سیاسییەکانی هەرێمی کوردستان بۆ مەسعود پزیشکیان بەمشێوەیە:

ـ ساناو فەریدون جوانڕۆیی، ئەندامی کۆمیتەی ناوەندی پارتی: پزیشکیان لە بەرەی ڕیفۆرمخوازەکانە و ئەگەری کرانەوەی زیاتری بە ڕووی دراوسێکانیدا هەیە، لەوەشدا هەرێمی کوردستان لە ڕووی سیاسی و ئابوورییەوە قازانج دەکات.

ـ سەعدی پیرە، ئەندامی مەکتەبی سیاسیی یەکێتیی نیشتمانی کوردستان: پێموانییە لە ئێران سەرۆککۆمار بتوانێ زۆر شت بگۆڕێت، بەڵام دەتوانێت ڕێگە نەدات زۆر شت ڕوو بدات و کار لەسەر نەهێشتنی ناکۆکییەکان لەگەڵ دراوسێکان بکات.

 

ـ عوسمان کاروانی، ئەندامی مەکتەبی سیاسیی یەکگرتوو: پێویستە چاوەڕوان بین تاوەکو بزانین سیاسەت و بیرکردنەوەی پزیشکیان بەرامبەر کورد و هەرێمی کوردستان چۆنە، هەرچەندە ناتوانێت لە چوارچێوەی سیاسەتی ئێران دەربچێت.

 

ـ فاروق عەلی، ئەندامی مەکتەبی سیاسیی کۆمەڵی دادگەری: مەسعود پزیشکیان بانگەشەی کرانەوەی بە ڕووی ڕۆژئاوا کرد، هیوادارم بەرامبەر خەڵکی وڵاتەکەی و دراوسێکانیشی جێبەجێیان بکات.

 

گریمانەی لایەنە کوردستانییەکان سەبارەت بە پەیوەندییەکانی هەولێر و تاران لە سەردەمی پزیشکیان:

ـ عوسمان کاروانی: ئەگەر هەولێر خۆی بیەوێت بە یەک دەنگ و دیدی هاوبەش مامەڵە لەگەڵ دراوسێکانی بکات، دەکرێت پەیوەندییەکی ئاسایی هەبێت.

ـ فاروق عەلی: پێموایە پەیوەندییەکانی هەولێر و تاران لەچاو پێشتر باشتر دەبێت.

ـ سەعدی پیرە: سەردانەکەی کاک مەسعود بارزانی بۆ بەغدا و کاک نێچیرڤان بۆ تاران گۆڕانکاری دروست کرد، ئەو بەستەڵەکەی لەنێوان هەولێر و تاران هەبوو تواندەوە، بۆیە پێموایە پەیوەندییەکانی هەولێر و تاران باشتر دەبێت.

ـ ساناو فەریدون جوانڕۆیی: بڕوام وایە پەیوەندییەکانی هەولێر و تاران باشتر دەبێت، چونکە ئێران فشاری ئابووری و سیاسیی زۆری لەسەرە.