ڕێکارەکانی پڕۆژەی دارایی بۆ ڕزگاربووانی ئێزدی دەست پێ دەکات

ئاڤا نیوز

ئەندامێکی دەستەی باڵای بنکەی لالش ڕایگەیاند، دەستیان بە ڕێکارەکانی پڕۆژەی پاڵپشتیی دارایی سەرۆکوەزیران بارزانی کردووە  بۆ ڕزگاربووانی دەستی داعش.

وێنە گەورەکە: ڕۆژی 02-07-2024، لە هەولێر سەرۆکوەزیران بارزانی پڕۆژەیەکی پاڵپشتیی دارایی بۆ ڕزگاربووانی دەستی داعش ڕاگەیاند.

بۆچی گرنگە: ئەو پڕۆژەیەی سەرۆکوەزیران بارزانی هاوکارییەکی گرنگە، چونکە ھێشتا بەشێکی زۆری کوردانی ئێزدی لە کەمپەکاندا دەژین و پێویستیان بەوە ھەیە ھاوکاری بکرێن.

لێدوانی فەرمی: جەعفەر سمۆ، ئەندامی دەستەی باڵای بنکەی لالش بە ئاڤا نیوزی گوت: ئەوان ئێستا سەرقاڵی ئامادەکارین و ڕێکارەکانی جێبەجێکردنی پڕۆژەکەیان دەست پێ کردووە و زیاتر لە سێ هەزار ژن و کچی ڕزگاربوو لێی سوودمەند دەبن.

زانیاریی زیاتر: هەموو هەوڵێک بۆ ئەوەیە پێش ڕێکەوتی 03-08-2024، کە دەکاتە ساڵڕۆژی کارەساتی شنگال ئەو پڕۆژەیە بکەوێتە بواری جێبەجێکردنەوە.

گۆشەیەکی دیکە: بەپێی قسەی ئەندامەكەی دەستەی باڵای بنکەی لالش، ئەوان لە هەوڵی ئەوەدان جگە لە کچ و ژنانی ڕزگاربوو، پیاوانی ڕزگاربووش سوودمەند بکەن لە پڕۆژە داراییەکەی سەرۆکوەزیران بارازانی.