بەپێی ئامارێک پێنج هەزار و 446 کەس لە چاکسازییەکانی هەرێمی کوردستاندان

ئاڤا نیوز

بەڕێوەبەری گشتیی چاکسازییەکانی هەرێمی کوردستان ئامارەکانی شەش مانگی بڵاوکردەوە، بەپێی ئامارەکە ئێستا پێنج هەزار و 466 کەس لە چاکسازییەکانی هەرێمی کوردستاندان.

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان لە کۆنگرەیەکی ڕۆژنامەوانیدا ڕایگەیاند: لە چاکسازییەکانی هەرێمی کوردستاندا کۆمەڵێک هەنگاومان ناوە کە لە عێراقیشدا بوونی نییە، لەوانەش "ژوانگەی خێزانی" و موڵەتی ماڵەوە و کردنەوەی سەنتەری شیاندنەوە.

زانیاریی زیاتر: لەم شەش مانگەدا 223 بەندکراو موڵەتیان پێدراوە بۆ چوونە ماڵەوە، "ژوانگەی خێزانی" کە هەفتانە خێزانەکان یەکتر دەبینن و دوو کاتژمێر لەگەڵ یەکتر دەمێننەوە، دوو هەزار و 848 ژوانگەی خێزانی هەبووە، ئەمەش ڕێژەی جیابوونەوەی لە چاکسازییەکاندا کردووەتە سفر.

ژمارەکان وادەڵێن: ئامارەکانی چاکسازاییەکانی هەرێمی کوردستان لە شەش مانگی ئەمساڵدا بەم شێوەیەیە:
•    چوار هەزار و 311 بەندکراو بۆ چاکسازییەکان هێنراون.
•    سێ هەزار و 934 بەندکراو سزایەکەیان تەواو کردووە و ئازادکراون.
•    533 سزادراو کاریان کردووە. 
•      474 قوتابی لەنێو چاکسازییەکاندا هەن

بۆچی گرنگە: ئەم هەنگاوانەی حکومەتی هەرێمی کوردستان لە چاکسازییەکاندا بە کارکردن بەپێی ستانداردی نێودەوڵەتی دادەنرێت و ڕەچاوکردنی مافی بەندکراوانە.