وەزارەتی دارایی: لیژنەیەک لە بەغداوە بۆ یەکخستنی ڕێکارە گومرگییەکان هاتووەتە هەولێر

ئاڤا نیوز

 

سەرچاوەیەک لە وەزارەتی دارایی هەرێمی کوردستان ڕایدەگەیێنێت، لیژنە گومرگییەکەی بەغدا بۆ یەکخستنی ڕێکارە گومرگییەکان هاتووە.

 

وێنە گەورەکە: هەفتەی ڕابردوو بۆ دووەم جار، لیژنەی باڵای نێوان هەرێمی کوردستان و عێراق کۆبوونەوە و یەکێک لە تەوەرەکانیش، یەکخستنی ڕێکارە گومرگییەکانی دەروازە سنوورییەکان بوو.

 

لێدوانی فەرمی: سەرچاوەیەک لە وەزارەتی دارایی حکومەتی هەرێمی کوردستان، بە ئاڤا نیوزی گوت: لیژنەی گومرگی بەغدا هاتوون بۆ یەکخستنی ڕێکارە گومرگیەکان، تا ئێوارەی ئەمڕۆ لەنێو وەزارەت سەرقاڵی کۆنووس ئامادەکردن بوون لەسەر ئەم بابەتە.

 

خاڵی ئەرێنی: بەپێی گوتەی ئەو سەرچاوەیە، جیاوازییەکی وا لەنێوان ڕێکارە گومرگییەکانی هەرێمی کوردستان و عێراق نییە، ڕەنگە تەنیا بابەتی تەکنیکی هەبێت.

 

لە لایەکی دیکەوە: عەبدولزەهرە هنداوی، گوتەبێژی وەزارەتی پلاندانان ڕایگەیاند، ڕێکەوتن لەسەر پێهکێنانی لیژنەی تەکنیکی کرا بۆ ئەوەی ڕاپۆرتی تایبەت لەسەر هەر تەوەرێک ئامادە بکات، کە پەیوەندی بە ڕێکارەکانی یەکخستنی دەروازە سنووری و  گومرگییەکانەوە هەیە.