عێراق لەسەر لەشکرکێشی تورکیا شاندێک دەنێرێتە هەرێمی کوردستان

ئاڤا نیوز 

 

سەرۆکوەزیرانی عێراق لەشکرکێشییەکانی تورکیا بۆسەر خاکی عێراق ڕەتدەکاتەوە، هاوکات بۆ وەرگرتنی هەڵوێستێکی یەکگرتوو شاندێک بە سەرۆكایەتیی ڕاوێژكاری ئاسایشی نیشتمانی ڕەوانەی هەرێمی كوردستان دەکات.

 

وێنە گەورەکە: ڕۆژی چوارشەممە 10-07-2024، محەممەد شیاع سوودانی، سەرۆكوەزیرانی عێراق و فەرماندەی گشتیی هێزە چەکدارەكان، سەرۆكایەتی كۆبوونەوەی ئەنجوومەنی وەزاری بۆ ئاسایشی نیشتمانیی عێراق كرد.

 

ڕاگەیێنراوی فەرمی: یەحیا ڕەسووڵ، گوتەبێژی فەرماندەی گشتیی هێزە چەکدارەکانی عێراق ڕایگەیاند: گفتوگۆ لەبارەی "دەستوەردان و پێشێلکارییەکان" لەلایەن هێزەکانی تورکیاوە لە ناوچە سنوورییە هاوبەشەکاندا کرا، "لەشکرکێشی و پێشێلکارییە" سەربازییەکانی تورکیا بۆ سەر خاکی عێراق ڕەتکرایەوە، هەروەها بە پێویست زانرا تورکیا ڕەچاوی پرەنسیبەکانی دراوسێیەتی باش بکات". 

 

زانیاریی زیاتر: لەسەر ڕاسپاردەی سەرۆکوەزیرانی عێراق شاندێک بە سەرۆکایەتیی ڕاوێژکاری ئاسایشی نیشتمانی دەچێتە هەرێمی کوردستان بەمەبەستی پێداچوونەوە بە دۆخی گشتی و وەرگرتنی هەڵوێستێکی یەکگرتوو لەسەر ئەم پرسە کە کاریگەری لەسەر سەروەریی عێراق هەیە".