کۆبوونەوەی ئەنجوومەنی پارێزگای کەرکووک بۆ ماوەیەک دواخرا

ئاڤا نیوز

کۆبوونەوەی ئەنجوومەنی پارێزگای کەرکووک بۆ ماوەیەک دواخرا، بەهۆی هەبوونی  ناکۆکی لایەنەکان لەسەر ئەوەی کۆبوونەوەکە بەکراوەیی بمێنێتەوە یان  بە داخراوی بکرێت.

چیرۆکی سەرەکی: دوای نزیکەی حەوت مانگ لە هەڵبژاردن، بڕیاربوو کاتژمێر 01:00ی دوانیوەڕۆی ئەمڕۆ پێنجشەممە لەسەر داوای محەممەد شیاع سوودانی، سەرۆکوەزیرانی عێراق، ئەنجوومەنی پارێزگای کەرکووک یەکەم دانیشتنی خۆی بکات.

چی ڕووی دا: بەهۆی نەچوونەژوورەوەی ئەندامانی فراکسیۆنی یەکێت و چەند ئەندامێکی عەرەب، ڕێژەی یاسایی ئەندامان تەواو نەبوو، بۆیە کۆبوونەوەکە بۆ ماوەیەک دواخرا.

هۆکارە زانراوەکان: یەکێتیی کە خاوەنی پێنج کورسی ئەنجوومەنەکەیە، ترسی هەیە سیناریۆی نەینەوا لە کەرکووک دووبارە ببێتەوە، بۆیە داوا دەکات ئەگەر کۆبوونەوەکە داخراو بێت دەبێت پێشوەختە ڕێککەوتن لەسەر دابەشکردنی پۆستەکان بکرێت، چونکە یەک مانگیان لەبەردەم دەبێت بۆ یەکلاکردنەوەی سەرجەم پۆستەکان.

زانیاریی زیاتر: هۆکارێکی دیکە ئەوەیە ئەگەر کۆبوونەوەکە بەکراوەیی بمێنێتەوە، ماوەی شەش مانگ  لەبەردەست دەبێت بۆ ڕێککەوتن لەسەر دابەشکردنی پۆستەکان و یەکلاکردنەوەی پارێزگار و تەواوکردنی کۆبوونەوەی یەکەم.