ئاڤا نیوز هۆکاری دواکەوتنی دانیشتنی ئەنجوومەنی پارێزگای کەرکووک ئاشکرا دەکات

ئاڤا نیوز

دوو کاتژمێرە دانیشتنی ئەنجوومەنی پارێزگای کەرکووک دواکەوتووە، ناکۆکی لایەنەکان لەسەر ئەوەیە بەشێک داوای کۆبوونەوەی کراوە و بەشێکیش داوای کۆبوونەوەی داخراو دەکەن.

بۆچی گرنگە: دوای نزیکەی حەوت مانگ لە هەڵبژاردن، بڕیاربوو ئەمڕۆ پێنجشەممە لەسەر داوای محەممەد شیاع سوودانی، سەرۆکوەزیرانی عێراق ئەنجوومەنی پارێزگای کەرکووک یەکەم دانیشتنی خۆی بکات.

ئەوەی ئێستا  ڕوودەدات: ئەندامانی فراکسیۆنی یەکێتیی نیشتمانیی کوردستان ئامادەی دانیشتنەکە نەبوون، بەهۆی ناکۆکیی لەسەر ئەوەی دانیشتنەکە بەکراوەیی بمێنێتەوە یان بە داخراوی بکرێت.

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی  پارێزگای کەرکووک بە ئاڤا نیوزی گوت: یەکێتی داوای کردووە کۆبوونەوەکە بەکراوەیی بمێنێتەوە.

هۆکارە زانراوەکان: یەکێتیی ترسی هەیە سیناریۆی نەینەوا لە کەرکووک دووبارە ببێتەوە، بۆیە داوا دەکات ئەگەر کۆبوونەوەکە داخراو بێت دەبێت پێشوەختە ڕێککەوتن لەسەر دابەشکردنی پۆستەکان بکرێت، چونکە یەک مانگیان لەبەردەم دەبێت بۆ یەکلاکردنەوەی سەرجەم پۆستەکان.

زانیاریی زیاتر: هۆکارێکی دیکە ئەوەیە ئەگەر کۆبوونەوەکە بەکراوەیی بمێنێتەوە، ماوەی شەش مانگ  لەبەردەست دەبێت بۆ ڕێککەوتن لەسەر دابەشکردنی پۆستەکان و یەکلاکردنەوەی پارێزگار و تەواوکردنی کۆبوونەوەی یەکەم.

ئەوەی پێویستە بیزانیت: ڕۆژی 18-12-2023 هەڵبژاردنی ئەنجوومەنی پارێزگاکان لە عێراق کرا، کورد لە کەرکووک توانی لە کۆی 16 کورسی، حەوت کورسی (یەکێتی پێنج کورسی و پارتی دوو کورسی) لەگەڵ کورسییەکی کۆتا بەدەستبهێنێت.