دەستەی دەستپاكی هەرێمی كوردستان لایەنە سیاسییەكانی كۆكردەوە

ئاڤا نیوز 

لەسەر داوای دەستەی دەستپاکی هەرێمی کوردستان، کۆبوونەوەیەک بۆ نوێنەرانی لایەنە سیاسییەکانی هەرێمی کوردستان لەبارەی " پەیماننامەی شەرەف" ساز کرا، دەستەکە هەوڵدەدات پەیماننامی شەرەف بە لایەنەکان واژۆ بکات.

وێنە گەورەکە: بە هاوکاری بەرنامەی گەشەپێدانی نەتەوە یەکگرتووەکان و بە ئامادەبوونی نوێنەرانی سەرۆکایەتی هەرێمی کوردستان کۆبوونەوەیەک سازکرا، بۆ گفتوگۆکردن بوو لەسەر ڕەشنووسی "پەیماننامەی شەڕەف" لە نێوان لایەنە سیاسییەکان و دەستەی دەسپاکی کە بە هاوکاری شارەزایانی ڕێکخراوی یوئێن دی پی. 

ئەوەی پێویستە بیزانیت: دوای گفتوگۆکردن بڕیار درا کە حیزبەکان لەماوەی دوو هەفتەی داهاتوودا، تێبینی و ڕای خۆیان، لەبارەی پەیماننامەکە بگەیەننەوە دەستەی دەستپاکی تا ئامادەبێت بۆ پەسەند کردن. 

بۆچی گرنگە: گرنگی بڕگەکانی پەیماننامەکە، پابەندبوونی لایەنە سیاسییەکانی کوردستانە، بە پڕەنسیپی سەروەری یاسا و بنەماکانی حکومڕانی تەندروست، دەستپاکی، دژایەتی  گەندەڵی، هەروەها پیادەکردنی شەفافییەت لە کاروباری ناوخۆی لایەنەکاندا و ڕێزگرتن لە دامەزراوە دەستوورییەکانی هەرێمی کوردستان. 

گۆشەیەکی دیکە: بە گوتەی دەستەی دەستپاکی، لە داهاتوودا هەر حیزبێکی سیاسیی واژۆ لەسەر پەیماننامەی پەسەندکراو بکات، ناوەکەی بڵاو دەکرێتەوە.