هادی عامری: بە مەرج پەیوەندی لەگەڵ تورکیا دروست دەکەین

ئاڤا نیوز

لەبارەی بوونی هێزەکانی تورکیا لە نێو خاکی هەرێمی کوردستان، سەرۆکی هاوپەیمانیی فەتح دەڵێت، ئەوان ئامادەنین لەگەڵ تورکیا هیچ پەیوەندییەک دروست بکەن، تاوەکو ئەو وڵاتە هێزە سەربازییەکانی دەکشێنێتەوە.

وێنە گەورەکە: بە بیانووی هەبوونی پەکەکە دەیان ساڵە تورکیا هێرش و جموجوڵی سەربازی و ئۆپەراسیۆن دەکاتە سەر ناوچە سنوورییەکانی هەرێمی کوردستان و ئێستا دەیان بنکەی لە خاکی کوردستان و عێراق هەیە، ئەمەش بووەتە هۆی چوڵکردنی سەدان گوند و زیانی گیانی و ماددی بۆ هاونیشتمانیان.

لێدوانی فەرمی: هادی عامری، سەرۆکی هاوپەیمانیی فەتح لە میانەی گوتارێکدا گوتی: "ئێمە دەمانەوێت پەیوەندی باش لەگەڵ تورکیا بونیاد بنێین، بەڵام ناکرێت و قبووڵیش ناکەین ئەم پەیوەندییە دروست ببێت، بەبێ کشانەوەی هێزەکانی تورکیا لە خاکی عێراقدا، ئێمە سازش لەسەر سەروەری خاکەکەمان ناکەین، ئەمە بابەتێکە بەهیچ شێوەیەک لەسەری بێدەنگ نابین".

لەلایەکی دیکەوە: هادی عامری دەڵێت "ئێمە لەگەڵ پاراستنی ئاسایشی تورکیاداین، ئامادەشین بۆ لێکتێگەیشتن و هەماهەنگی، دەستوور ڕێگە بە بوونی هیچ هێزەک نادات هەڕەشە بێت لەسەر وڵاتانی دراوسێ". هادی عامری وادەڵێت.