ئاسایش لەبارەی هێرشەکەی کەرکووک ڕوونکردنەوە دەدات

ئاڤا نیوز 

لە ڕووبەڕووبوونەوەی نێوان هێزەکانی ئاسایش و چەکدارانی داعش لە سنووری کەرکووک، چەکدارێک دەکوژرێت و کارمەندێکی ئاسایش شەهید دەبێت.

 

چیرۆکی سەرەکی: کاتژمێر 08:00ـی بەرەبەیانی ئەمڕۆ یەکشەممە، دوو چەکداری داعش لە بۆشایی ئەمنیی نێوان سوپای عێراق و هێزەکانی پێشمەرگە، دزە دەکەنە نێو ناحییەی قەرەهەنجیر و لەگەڵ هێزەکانی ئاسایش ڕووبەڕووی یەکدی دەبنەوە.

 

ڕاگەیێنراوی فەرمی: دەزگای ئاسایشی هەرێمی کوردستان ڕایگەیاند، هێزەکانی بەڕێوەبەرایەتی ئاسایشی کەرکووک لە ئەنجامی دەستخستنی زانیاریی پێشوەخت و چاودێری ورد و بەدواداچوون بەمەبەستی دەستگیرکردنی دوو چەکداری داعش، ڕووبەڕوبوونەوە لەنێوانیان ڕووی دا، لەئەنجامدا چەکدارێک کوژرا و یەکێکی دیکە بە برینداری دەستگیر کرا. 

ئەوەی پێویستە بیزانیت: ئاسایش بۆی ڕوونبووەتەوە، ئەو دوو چەکدارەی داعش لە ماوەی ڕابردوودا چوار کردەوەی تیرۆریستییان لە سنووری پارێزگای کەرکووک ئەنجامداوە.

زانیاریی زیاتر: لە کردەوەی یەکەم کارمەندێکی پۆلیسیان شەهید کردووە لە گەڕەکی شۆراو. لە کردەوەی دووەم لە گەڕەکی پەنجا عەلی لە کاتی دانانی بۆمبی چێنراو ڕووبەڕووبوونەوە ڕووی داوە و کارمەندێکی پۆلیس شەهید بووە. لە کردەوەی سێیەم دوو کارمەندی پۆلیسی کەرکووک لەناو بازاڕ شەهید بوون. لە کردەوەی چوارەمدا لە بەردەم نەخۆشخانەی جمهوری ئەفسەرێکی پۆلیسیان شەهید کردووە.