لە سلێمانی ژیانی هەزاران کەس لە مەترسیدایە

ئاڤا نیوز


ژمارەیەک پاڵاوگەی نەوت و کارگەی جۆراوجۆر ژیانی 12 هەزار هاونیشتمانیی باکووری سلێمانی دەخەنە مەترسییەوە. بەدەر لە مرۆڤ، ژینگە و ئاژەڵانیش قوربانی ئەم پاشماوانەن. بەرپرسێکی باڵای یەکێتی سەرپەرشتیی پاڵاوگەکان دەکات و ڕێگری لە چارەسەرکردنی کێشەکە دەکات.

چیرۆکی سەرەکی: پێنج پاڵاوگەی نایاسایی کەوتوونەتە سەر شەقامی 100 مەتری لە سنووری ناحیەی تانجەرۆ کە ژمارەی دانیشتووانی  12 هەزار کەسە. پاڵاوگەکان جگە لە بڵاوکردنەوەی بۆنی ناخۆش، پاشماوەکانیان مەترسییان لەسەر تەندروستی خەڵک دروست کردووە، بەڵام هاونیشتمانیان بێهیوان لە چارەسەر، چونکە بەرپرسێکی باڵای ئیدارەی گشتیی یەکێتی کە ناوی لای ئاڤا نیوز پارێزراوە، سەرپەرشتییان دەکات و ڕێگە نادات چاودێرییان بخرێتە سەر.

ئەوەی پێویستە بیزانیت: جگە لەو پێنج پاڵاوگەیە، دوو کارگەی دروستکردنی نایلۆن، کارگەی ڕیسایکلینی خاشاک و پاشماوەی تەندروستیی نەخۆشخانەکانی سلێمانی، تەنیا کیلۆمەترێک لە ئاوەدانی دوورن. ئەمانە هەمووی، ژیانی هەزاران هاونیشتمانییان هەراسان کردووە.

زانیاریی بەدەستهاتوو: جگە لە دووکەڵی پاڵاوگە و کارگەکان، پاشەڕۆکانیشیان فڕێ دەدرێتە چەمی تانجەرۆوە کە سەرچاوەی ئاوی خواردەنەوەی دانیشتووانی سنوورەکە و ئاژەڵی ئاژەڵداران و تێراوکردنی سەوزەی ناوچەکەیە. تەنیا لە یەک ساڵدا، پێنج جار ئاوی خواردنەوەی ماڵان گۆڕاوە و زەرد هەڵگەڕاوە.

بۆچی گرنگە: ئاژەڵێکی زۆر بەهۆی خواردنەوەی ئاوی چەمەکە مردار بوونە. هاوکات جووتیارانیش بۆ ئاودانی سەوزە بەکاری دەھێنن، ئەمەش مەترسی زۆری هەیە بەهۆی گواستنەوەی ژەهری پاشماوەی پاڵاوگەکان، هاووڵاتیان تووشی ژەهراویبوون و نەخۆشی دەگمەن و شێرپەنجە بکات.