خانەنشینانی هێزەكانی 70 ئەمڕۆ تەنیا یەک مووچەیان پێدرا

ئاڤا نیوز  

لەکاتێکدا دەبوو ئەمڕۆ دوو مووچەیان پێکەوە پێبدرێت، بەڵام تەنیا یەک مووچە بە خانەنشینانی هێزەکانی 70ی پێشمەرگە درا.

وێنە گەورەکە: ئەمڕۆ مووچەی دوو مانگی وەزارەتی پێشمەرگە و یەکەکانی 70 و 80 و فەرماندەیی پێشمەرگەی زێرەڤانی و بەرگریی فریاکەوتن دابەش کرا، خانەنشینانی هەردوو یەکەکەش لەو چوارچێوەیە مووچە وەردەگرن، بەڵام خانەنشینانی یەکەی 70 یەک مووچەیان پێدراوە.

زانیاریی بەدەستهاتوو: سەرچاوەیەک لە فەرماندەیی هێزەکانی 70 بە ئاڤا نیوزی گوت: ئەمڕۆ لە بانکەکانی سنووری پارێزگای سلێمانی، تەنیا مووچەی مانگی پێنج بە خانەنشینانی هێزەکانی 70 دراوە و پێیان گوتراوە مووچەی مانگی شەش لەگەڵ مانگی حەوت بەیەکەوە لە مانگی داهاتوو لە وەزارەتی پێشمەرگە وەردەگرن.

زانیاریی زیاتر: ئەمڕۆ لە بانکەکان بە خانەنشینانی یەکەی 70 گوتراوە کە چەکی بانکی تەنیا یەک مانگ هاتووە و ناتوانن مووچەی دوو مانگ دابەش بکەن.

لە لایەکی دیکەوە: سەرچاوەیەک لە فەرماندەیی هێزەکانی 80 بە ئاڤا نیوزی گوت: مووچەی خانەنشینانی هێزەکانی 80 کێشەی نییە و مووچەی مانگەکانی پێنج و شەش بەیەکەوە وەردەگرن.