وردەكاریی دزینی نەوت لە كەركووك و چوار پارێزگای عێراق ئاشكرادەبێت

 ئاڤا دیجیتاڵ

دەزگای ئاسایشی نیشتمانیی عێراق لەبارەی کونکردنی بۆرییە نەوتەکەی کەرکووک و چەند پارێزگایەکی دیکە ڕوونکردنەوەیەکی بڵاوکردەوە و ڕایگەیاند دەستیان بە لێکۆڵینەوە کردووە، دەشڵێت بۆرییەکەی کەرکووک لەژێر زەویدا بووە.

ڕاگەیێنراوی فەرمی: "لەپارێزگای بەسڕە بە پشت بەستن بە زانیاری هەواڵگری توانیمان گەراجێک بدۆزینەوە لە ناوچەی زوبێر کە بەکارهاتووە بۆ دزینی نەوتی خاو و زیاتر لە سێ ملیۆن لیتر نەوتیان كۆگا كردووە بۆ دزین و بە پشت بەستن بە چەند لایەنێک هەناردەیان کردووەو 68 کەسیش دەستگیرکراون."

لەلایەکی دیکەوە: ئاسایشی نیشتمانی عێراق دەڵێت، "لەپارێزگای کەرکووک هێزەکانمان توانییان دوای وەرگرتنی زانیاری هەواڵگری لەسەر ڕێگەی کەرکووک- بەغدا پڕۆسەیەکی دزینی نەوت لەڕێگەی بۆرییەوە ئاشکرا بکەن کە لەژێر زەویدا بووە و بۆ دزینی نەوتی سپی بەکارهێنراوە و لێکۆڵینەوەش لە دزییەکە دەستیپێکردووە".

زانیاری زیاتر:" لە دیالە و نەینەوا و واست، هێزەکانمان توانیویانە چەند مەیدانێکی کۆگاکردنی پێکهاتە نەوتییەکان ئاشکرا بکەن کە زیاتر لە 85 هەزار لیتر نەوتیان تێدابووە و دەست بەسەر چەندین ئامێر و کەرەستەشدا گیراوە کە بۆ دزینی نەوت بەکارهاتوون، هەروەها شۆفێری چوار ئۆتۆمبێل دەستگیرکراون کە بەشداربوون لە دزینی نەوتەکە و ئێستاش لێکۆڵینەوە لە دزینی نەوت لەو پێنج پارێزگایە و ئەو کەسانە دەکرێت کە دەستگیرکراون". ئاسایشی نیشتمانیی عێراق وا دەڵێت.