هەولێر و بەغدا لەبارەی بەڕێوەبردنی دەروازە سنوورییەکان ڕێکنەکەوتوون

ئاڤا نیوز

بەڕێوەبەری گشتیی دەروازە سنوورییەکان ڕایدەگەیێنێ، لەگەڵ حکومەتی عێراق بۆ بەڕێوەبردنی دەروازە سنوورییەکان نەگەیشتوونەتە ڕێککەوتن. تێبینی و گلەییەکانیشیان  ڕەتدەکاتەوە و دەڵێت پڕوپاگەندەن.

وێنە گەورەکە: حکومەتی عێراق داوای ڕادەستکردنی بەڕێوەبردنی دەروازە سنوورییەکان بەپێی یاسای ژمارە 30ی ساڵی 2016 دەکات، بەڵام هەرێمی کوردستان داوای هەموارکردنی یاساکە دەکات. یاساکە باس لەوە دەکات دەروازەکان لەڕووی کارگێڕی و ئەمنییەوە بە هەماهەنگی لەگەڵ هەرێمی کوردستان بەڕێوەببرێن.

 

لێدوانی فەرمی: ساماڵ عەبدولڕەحمان، بەڕێوەبەری گشتیی دەروازە سنوورییەکانی هەرێمی کوردستان بە ئاڤا نیوزی گوت: کێشەکە ماوە و یەک کۆبوونەوە لەوبارەیەوە کراوە، کۆبوونەوەی داهاتوو هێشتا دیارنییە کەی دەکرێت.

خاڵی نەرێنی: ساماڵ عەبدولڕەحمان دەڵێت "بەغدا هیچی بەدەستەوە نییە و پڕوپاگەندە لەسەر دەروازەکان دەکات، ئەوانەی دەیڵێن ئێمە بەتەواوی ڕەتیان دەکەینەوە". پێشتر شاندی حکومەتی عێراق بە شاندی هەرێمی کوردستانیان  گوتبوو دەروازەکانی باشماخ  و پەروێزخان هەموو جۆرە بازرگانییەکی قاچاخیان تێدا دەکرێت و بوونەتە بەڵا و شەرمەزاری بۆ عێراق.