داتا و زانیاریی لەبارەی یەکسانکردنی بڕوانامە ڕەوانەی ئەنجوومەنی وەزیران دەکرێت

ئاڤا نیوز

ئەو فەرمانبەرانەی داوای یەکسانکردنی بڕوانامەکانیان دەکەن ناویان ڕەوانەی ئەنجوومەنی وەزیران دەکرێت، لەگەڵیدا داتا و زانیاریی و لێکەوتی مووچەیان دەنێردرێت.

وێنە گەورەکە: لە ساڵانی 2013 بۆ 2019  نزیکەی چوار هەزار فەرمانبەر بێ مۆڵەت خوێندوویانە، بڕوانامەکەیان یەکساننەکراوە، زیاتر لە ساڵێکە وەزارەتی دارایی کار لەسەر کۆکردنەوەی داتا و زانیارییەکان دەکات، بۆ ئەوەی ڕەوانەی ئەنجوومەنی وەزیران بکرێت بە مەبەستی وەرگرتنی ڕەزامەندی.

لێدوانی فەرمی: د. هاوڕێ کەمال، ڕاوێژکار لە وەزارەتی دارایی بە ئاڤای گوت، "دوای ئەوەی نووسراوێکمان بۆ سەرجەم وەزارەتەکان کرد، تاوەکو داتا و زانیاریی سەبارەت بەو فەرمانبەرانە بنێرن کە بڕوانامەی بێ مۆڵەتیان هەیە، ئێستا داتا و لێکەوتە داراییەکانمان بۆ گەڕاوەتەوە، دوای ئەوەی پۆلێنکران لێکەوتی مووچە و ژمارەیان دیاردەبێت و ئینجا ڕەوانەی ئەنجوومەنی وەزیران دەکرێت."

ئەمەش بزانە: لەماوەی ساڵێکدا ڕوونکردنەوە سەبارەت بە لێکەوتەکانی ئەو پرۆسەیە ئامادەکراوە،  کە بڕی ئێستا چەند دەکەوێت و ئەگەر بڕوانامە هەژمارکرا مووچەیان دەبێتە چەند و بڕی چەند پارەی پێویستە.