لە سلێمانی ماددەی هۆشبەر لەنێو چوار تابلۆی هونەری دەدۆزرێتەوە

ئاڤا نیوز

بەڕێوەبەرایەتیی گشتیی ئاسایشی سلێمانی دەست بەسەر چوار تابلۆدا دەگرێت کە  زیاتر لە دوو كیلۆ ماددەی هۆشبەریان تێدا شاردرابووەوە، تۆمەتبارێکیش دەستگیر دەکرێت.

ڕاگەیێنراوی فەرمی: بەڕێوەبەرایەتیی نەهێشتنی ماددە هۆشبەرەکانی دەزگای ئاسایشی سلێمانی ڕایگەیاند، تابلۆکان ماددەی هۆشبەری جۆری كریستاڵیان تێدا شاردرابووەوە، لە دەرەوە هەرێمی کوردستان هێنراونەتە پارێزگای سلێمانی و تۆمەتباران بەنیاز بوون بۆ دەرەوەی وڵات بیانگوازنەوە.

زانیاریی زیاتر: تۆمەتبارێك بە ماددەی 26 لەیاسای بەرەنگاربوونەوەی ماددە هۆشبەرەکان و کارتێکارە ئەقڵییەکان لەسەر بابەتەکە دەستگیرکراوە و لێکۆڵینەوە لە دۆسیەکەی بەردەوامە. 

باکگراوند: بەپێی داتاکانی ئەنجوومەنی ئاسایشی هەرێمی کوردستان، لە ماوەی هەشت مانگ و نیوی ڕابردوودا دەیان کەس بەتۆمەتی کڕین و فرۆشتنی ماددەی هۆشبەر دەستگیرکراون، 952 کیلۆگرام ماددەی هۆشبەری جۆراوجۆریش دەستی بەسەردا گیراوە.