دوو لە ڕێککەوتنە ئابوورییەکانی ماڵی کوردستان لە داڤۆس جێبەجێدەکرێن

ئاڤا دیجیتاڵ

سەرۆکی دەستەی وەبەرهێنانی هەرێمی کوردستان بە ئاڤا نیوزی ڕایگەیاند، دوو ڕێککەوتن کە لە ماڵی کوردستان لە داڤۆس لەگەڵ ئیمارات و ئۆکراینا واژۆکراون کەوتوونەتە بواری جێبەجێکردنەوە.

بۆچی گرنگە: بەشداریکردنی ئەمساڵی هەرێمی کوردستان لە کۆڕبەندی ئابووری جیهان جیاواز بوو چونکە بۆ یەکەمجار ماڵی داڤۆس کرایەوە و ژمارەیەک سەرمایەداری کورد بەشداریانکرد و توانییان چەند گرێبەستێکی ئابووریی و بازرگانی لەگەڵ سەرمایەدارانی وڵاتانی دیکە واژۆ بکەن. 

لێدوانی فەرمی: "کردنەوەی ماڵی کوردستان لە داڤۆس دەرگایەکی فراوانتری بۆ هەرێمی کوردستان کردەوە، 75 کۆبوونەوە و چاوپێکەوتن لەنێوان وەبەرهێنەرانی هەرێمی کوردستان و وڵاتانی دیکە ئەنجام دران"، د. محەممەد شوکری، سەرۆکی دەستەی وەبەرهێنانی هەرێمی کوردستان ئەمەی ئاڤا نیوز گوت.

بە گوتەی د. محەممەد شوکری دوو ڕێککەوتن لەنێوان وەبەرهێنەرانی هەرێمی کوردستان و کۆمپانیاکانی وڵاتانی دەرەوە کەوتوونەتە بواری جێبەجێکردنەوە کە یەکێکیان لەگەڵ وڵاتی ئیماراتە و ڕێککەوتنەکەی دیکەش لە بواری گەنمە لەگەڵ ئۆکراینایە.