ئەمساڵ هەشت هەزار کەس لە عێراق لەسەر ماددە هۆشبەرەکان دەستگیرکراون

ئاڤا نیوز

وەزارەتی ناوخۆی عێراق ڕایگەیاند، لە سەرەتای ئەمساڵەوە هەشت هەزار کەس لەسەر بەکارهێنان و بازرگانیکردن بە ماددە هۆشبەرەکان دەستگیرکراون، دەستیش بەسەر زیاتر لە دوو تۆن ماددەی هۆشەبەردا گیراوە.

وێنە گەورەکە: جیا لە بەکارهێنەران کە ڕۆژ لەدوای ڕۆژ ژمارەکە لە بەرزبوونەوەدایە، چەندین تۆڕی ناوخۆیی و نێودەوڵەتیی تایبەت بە ماددە هۆشبەرەکان لە عێراقدا چالاکن، بەپێی نوێترین ڕاپۆرتی نەتەوەیەکگرتووەکان کە لە ڕێگەیەوە هۆشداری دابوو، خەریکە عێراق دەبێتە ناوەندێک بۆ بڵاوبوونەوەی ماددە هۆشبەرەکان لە ناوچەکەدا.

لێدوانی فەرمی: لیوا موهەنەد حاتم، بەڕێوەبەری بەشی یاسایی لە بەڕێوەبەرایەتیی كاروباری ماددە هۆشبەرەكان بە ئاژانسی هەواڵی عێراقی ڕاگەیاندووە: جۆری ئەو ماددە هۆشبەرانەی دەستیان بەسەردا گیراوە بریتین لە "حەشیش، كریستاڵ كاپتاگۆن و چەند جۆرێکی دیکە"، بڕکەیشی دوو تۆن و 20 کیلۆ بووە. ئەمە جگە لە دەستگیرکردنی نزیكەی هەشت هەزار تۆمەتبار لە بەكارهێنەر و بازرگانانی ماددە هۆشبەرەكان لە سەرەتای ئەمساڵەوە.

زانیاریی زیاتر: عێراق بە وڵاتێكی ترانزێت  بۆ ماددە هۆشبەرەكان دادەنرێت، بەڵام لەم چەند ساڵەی دواییدا بڵاوبوونەوەی ئەو ماددانە وای کردووە ببێتە بەكارهێنەر.

لەلایەکی دیکە: زیاد خەلەف گاتع، بەڕێوەبەری سەنتەری بەدواداچوون و توێژینەوە لە وەزارەتی ناوخۆ ڕایگەیاند، "ئەمساڵ 25 تۆڕی نێودەوڵەتی بازرگانیکردن بە ماددە هۆشبەرەکان بە هاوکاری لەگەڵ وڵاتانی دراوسێ هەڵوەشێندراونەتەوە".