کۆمپانیاکانی بیمەی خانووبەرەی ئەمریکا گەورەترین زیانی 'سەدە' تۆمار دەکەن

ئاڤا نیوز

 

کۆمپانیاکانی بیمەی خانووبەرە لە ئەمریکا زۆرترین زیانیان لە ساڵی 2023 تۆمار کردووە، ئەوەش بە گەورەترین زیانی سەدە دادەندرێت، چونکە ئەو بڕەی بەهۆی زیانەکان دراوەتەوە زۆر زیاتر بووە بەراورد بە پێشبینییەکان. 

 

چیرۆکە سەرەکییەکە: بە گوێرەی راپۆرتێکی رۆژنامەی فاینانشیال تایمز، کۆمپانیاکانی بیمەی خانووبەرە بەدرێژایی ساڵی ڕابردوو 15.2 ملیار دۆلار زیانیان بەرکەوتووە، کە ئەوەش بەرزترینە لە دوای ساڵی 2000ـەوە تۆمارکرابێت. 

 

هۆکارە زانراوەکان: زیانی کۆمپانیاکان بۆ زۆری کارەساتە سرووشتی و هەڵاوسان و گەشەی دانیشتووان لەو ناوچانە دەگەڕێتەوە کە بە زۆری دووچارە کارەساتە سرووشتییەکان دەبنەوە. بە تایبەت لە شەش ویلایەتی ئەمریکا ژمارەی پێوانەیی تۆمارکراوە، لە دیارترینیان کالیفۆرنیان و تێکساس. 

 

زانیاریی زیاتر: لە رۆژنامەکەدا هاتووە، کۆمپانیاکانی بیمە ناچاربوونە لەو ناوچانەی دووچاری کارەساتی سرووشتی دەبنەوە، کارەکانیان سنووردار بکەن، یاخود لێی دەربچن یان نرخەکان بەرز بکەنەوە، تاوەکو بتوانن زیانەکان بۆ خاوەن ماڵەکان بژمێرن.