نوێكردنەوەی مۆڵەتی بانكە تایبەتەکان بۆ ساڵی نوێ قورستر دەكرێن

ئاڤا نیوز

بانكی ناوەندیی عێراق مەرجی ڕێگەپێدان و نوێكردنەوەی مۆڵەتی بانكە ئەهلییەكانی بۆ ساڵی 2026، قورس كردووە؛ بانكەكان پابەند دەکرێن کە قەبارەی سەرمایەكانیان لە سەرووی 350 ملیار دینار بێت و بۆ ساڵی 2027ـش ئاستی سەرمایەكانیان لە 400 ملیار دینار كەمتر نەبێت.

وێنە گەورەكە: بەهۆی داواكاری و مەرجە سەختەكانی ئەمریكا، بانكی ناوەندیی عێراق پرۆسەیەكی گشتگیر و فراوانی چاكسازیی بانكی ڕاگەیاندووە. كۆمپانیای ڕاوێژكاری دارایی ئەمریكی "ئۆلیڤەر وایمان" سەرپەرشتی پرۆسەكە دەكات، بە چاودێری ڕاستەوخۆی وەزارەتی گەنجینەی ئەمریكا و بانكی فیدڕاڵی ئەمریكا و بانكی جی پی مۆرگان.

نووسراوی فەرمی: بەپێی نووسراوێكی بانكی ناوەندیی عێراق كە وێنەیەكی تایبەت دەست ئاڤا میدیا كەوتووە، تێیدا وەڵامی نووسراوێكی ڕابیتەی بانكە ئەهلییەكانی عێراقی داوەتەوە لەبارەی گرتنەبەری هەنگاوی كردەیی بۆ پرۆسەی چاكسازیی لە سێكتەری بانكی و تاوتوێكردنی داواكارییەكانیان بە هەڵگرتنی كۆت و بەندی سەر بانكەكان كە وایكردووە نەتوانن بە سیستمی دارایی جیهانییەوە ببەسترێنەوە.

زانیاریی زیاتر: بانكی ناوەندی بە ڕاشكاوی بە بانكە تایبەت و بازرگانییەكانی ڕاگەیاندووە كە ناتوانێت ئەو كۆت و بەندانە لاببات كە لەلایەن نووسینگەكانی چاودێریی بیانییەوە 'OFAC' دانراون، بەتایبەت لە پرسی سڕكردنی بانكەكان لە پێدانی دۆلار.

بابەتە ستراتیژییەكە: بەپێی ئەو مەرجە قورسانەی بۆ نوێكردنەوەی مۆڵەتی بانكە ئەهلی و بازرگانییەكان دانراون، پێدەچێت بەشێك لە بانكەكان لە پرۆسەكە بكشێنەوە و خۆیان هەڵبوەشێننەوە، بەوپێیەی؛ پێویستە قەبارەی سەرمایەی هەر بانكێك لە ساڵی نوێدا 350 ملیار دینار بێت و لەساڵی 2027ـش سەرمایەكەی بگاتە 400 ملیار دینار، ئەوەش لەكاتێكدا لە ساڵانی ڕابردوو بانكەكان پابەندكرابوون ئاستی سەرمایەكانیان 250 ملیار دینار بێت و ئەمساڵیش بڕەكە بۆ 300 ملیار دینار بەرزكرایەوە، بەهۆیەوە چەندین بانك نەیانتوانی پابەندی ئەو مەرجە بن.

سەرەكیترین مەرجەكان چین:

- ئاستی سەرمایەی هەر بانكێك لە ساڵی 2026ـدا، سەرووی 350 ملیار دینار بێت.

- هەر بانكێك تا ناوەڕاستی ساڵی داهاتوو، ڕاپۆرتی ڕوونكردنەوە داراییەكانی ساڵانە بۆ بانكی ناوەندی بەرزبكاتەوە؛ لەمبارەیەوە پێشنیازی بانكەكان ڕەتكراوەتەوە كە داوایان كردووە لە وەرزی سێیەمی ساڵی 2026 ڕاپۆرت بەرز بكەنەوە.

- ئەو بانكانەی لەجۆری وەبەرهێنان و گەشەپێدانی پرۆژەی وەبەرهێنانن، چانسی نوێكردنەوەی مۆڵەت و ڕێگەپێدانیان لە بانكەكانی تری ڕكابەریان زیاتر دەبێت، باشترە پەیوەندییان لەگەڵ وەبەرهێنەرانی بیانی هەبێت و وەبەرهێنەران وەك گیرفانێكی عێراقی باوەڕپێكراو، متمانەیان پێی هەبێت.