پسپۆڕێک: حەبی منداڵبوون هۆکاری تووشبوونی %20ـی ژنانە بە شێرپەنجەی مەمک

ئاڤا نیوز

 

پسپۆڕێکی دەستنیشانکردنی شێرپەنجە بە تیشک ئاشکرای دەکات، زۆرینەی ئەو کچ و ژنانەی تووشی شێرپەنجەی مەمک دەبن، هۆکارەکەی زۆر بەکارهێنانی حەبی منداڵبوون و ڕێگریکردنە لێی(مەنع).

 

وێنە گەورەکە: ساڵانە لە پاڵ وڵاتانی جیهاندا، لە هەرێمی کوردستانیش ژمارەی تووشبووانی شێرپەنجەی مەمک زیاد دەکات و پسپۆڕانیش هۆکارەکەی بۆ ناڕێکیی شێوازی ژیان، جگەرەکێشان، خواردنەوەی مەی و وەرگرتنی هۆڕمۆنی نا سروشتی دەگەڕێننەوە.

 

لێدوانی تایبەت: د. نیگار حەوێزی، پسپۆڕی دەستنیشانکردنی شێرپەنجە بە تیشک بە ئاڤای گوت: "لە هەرێمی کوردستان زۆرینەی تووشبووانی شێرپەنجەی مەمک، گەنجن. لە سەدا بیستی ئەو ئافرەتانەی تووشی دەبن، هۆکارەکەی بەردەوام بەکارهێنانی حەبی منداڵبوون و مەنعیەتی".

 

زانیاریی زیاتر: سەبارەت بە هۆکاربوونی بەکارهێنانی ستیان بۆ تووشبوون بە شێرپەنجەی مەمک، د. نیگار حەوێزی ئاماژە بەمە دەدات: "ڕاستەخۆی نابێتە هۆی دروستبوونی، بەڵام نابێت بە شەوان ببەسترێت. هەروەها دەبێت کچان و ژنان بە دەست مەساج بە مەمکەکانیان بکەن، چونکە ڕژێنـ(لیمف)ـێک هەیە لە مەمکەکانیان و دەبێت جووڵەی پێبکرێت".

 

گۆشەیەکی دیکە: "99%ـی ئەو کچ و ژنانەی لە قۆناغی یەکەم و دووەمی تووشىوون بە شێرپەنجەی مەمکن، چاک دەبنەوە. لە هەرێمی کوردستان چارەسەرییەکانی لە ئاستێکی زۆر باشدان و بەراورد بە وڵاتێکی وەک ئێران، هەرێمی کوردستان زۆر پێشکەوتووترە و متمانەی تەواوەتی پێدەکرێت". د. نیگار حەوێزی وادەڵێت.

 

باکگراوەند: بەگوێرەی داتاکانی ڕێکخراوی تەندروستیی جیهانی، لە هەر 8 ژنێک، دانەیەکیان مەترسیی تووشبوونی بە شێرپەنجەی مەمک هەیە. لەم ژمارەیەشدا 9%ـیان تەمەنیان لە ژێرەوەی 40 ساڵییە.