پزیشکێکی دهۆک لە كۆنفرانسێکی جیهانی لە ئیمارات پلەی یەكەم بەدەست دەهێنێت

ئاڤا نیوز

پزیشكێكی پسپۆڕی نەخۆشییەکانی دڵ و هەناو لە شاری دهۆک، لە کۆنگرەیەکی نێودەوڵەتیی لە ئیمارات بەشداریكرد، توانی بە خستنەڕووی حاڵەتێکی دەگمەنی چارەسەریی پزیشکی، پلەی یەکەم لەسەر ئاستی سەرجەم بەشداربووان بەدەستبهێنێت.

چیرۆکی سەرەکی: لە وڵاتی ئیمارات، کۆنفرانسی ساڵانەی 'کۆمەڵەی کەنداو بۆ دەستێوەردانی پزیشکیی دڵ و قەستەرە (GIS)' بەڕێوەچوو، تێیدا نوێترین توێژینەوە و تەکنیکەکانی بواری قەستەرە و نەشتەرگەریی دڵ لەلایەن پزیشکانی جیهانەوە تاوتوێ کران و خرانەڕوو.

دكتۆر محەممەد سەلیم، پزیشكی پسپۆڕ لە سەنتەری ئازادی بۆ نەخۆشییەكانی دڵ لە دهۆک، وەك یەكێك لە نوێنەرانی هەرێمی كوردستان و عێراق بەشداریی لە کۆنگرەكە كرد، لەمیانی کۆنفرانسكەدا، چیرۆكی سەركەوتنی چارەسەركردنی نەخۆشێكی خستەڕوو كە تووشی گیرانی تەواوەتیی خوێنبەری چەپی دڵی ببوو كە ناوی زانستی نەخۆشییەكە؛ (Left Main Artery)ـە.

ئەوەی پێویستە بیزانیت: کردنەوەی خوێنبەرێک کە بە تەواوی گیرابێت یاخود تووشی گیرانی کتوپڕ بووبێت، یەکێکە لە قورسترین پرۆسەکانی قەستەرە و پێویستی بە لێهاتوویی بەرز و تەکنەلۆژیای پێشکەوتوو هەیە.

ڕاگەیێنراوی فەرمی: بەڕێوەبەرایەتیی گشتیی تەندروستیی دهۆک، لە ڕاگەیێنراوێكی فەرمیدا دەسكەوتی پزیشكە كوردەكەی بە شانازییەكی گەورە بۆ كەرتی تەندروستیی پارێزگای دهۆك و سەرجەم پزیشكانی كوردستان وەسف كرد.

ئەوەی لەبارەیەوە دەگوترێت: تەندروستیی دهۆك باسی لە داهێنانەكەی دكتۆر محەممەد كردووە و ئەوەی خستووەتەڕوو، پێشتر نەشتەرگەریی قەستەرە بۆ نەخۆشێك كراوە و تۆڕ و باڵۆنی بۆ دانراوە، كەچی دۆخی تەندروستیی ئەو نەخۆشە ئاڵۆزتر بووە و دووچاری جەڵتەیەكی سەختی دڵ بووە، سەرەڕای مەترسییەكان لەسەر ژیانی نەخۆشەكە، پزیشكەكەی شاری دهۆك، توانیویەتی لەڕێگەی بەكارهێنانی چەند تەکنیکێکی نوێ و پێشکەوتووی بواری قەستەرە، بەسەر ئاڵۆزییەکاندا زاڵ بێت و ژیانی نەخۆشەکە لە مردن ڕزگار بکات. لە ئێستادا دۆخی تەندروستیی نەخۆشەکە جێگیر و باشە.

پەیوەست بەم بابەتە: سەنتەری دڵی ئازادی، لە شاری دهۆک بە یەکێک لە سەنتەرە پێشکەوتووەکانی عێراق دادەنرێت کە ساڵانە هەزاران نەشتەرگەریی قەستەرەی تێدا ئەنجام دەدرێت و خزمەت بە هاووڵاتیان دەكات، تەنانەت لە دەرەوەی پارێزگای دهۆكیش خەڵكی بۆ چارەسەری سەردانی دەكەن.