فەرماندەیەكی مقاوەمە بۆ ئاڤا: هیچ هێرشێک لە ناوخۆی عێراقەوە ناکرێتە سەر ئیسرائیل

ئاڤا نیوز

 

فەرماندەیەکی باڵای گرووپە چەکدارەکانی هاوپەیمانی ئێران لە عێراق ڕایگەیاند "گرووپە چەکدارە هاوپەیمانەکانی ئێران لە ناو عێراقدا هیچ هێرشێک لە عێراقەوە بۆ سەر ئیسرائیل ئەنجام نادەن".

زانیاریی بەدەستهاتوو: فەرماندەیەكی باڵای "بەرەی مقاوەمەی ئیسلامی لە عێراق" بە ئاڤا نیوزی گوت: "گرووپە چەکدارە ئێرانی، عێراقی، یەمەنی، لوبنانی، سوورییەكان، تۆڵەی کوشتنی ئیسماعیل هەنییە، سەرۆکی مەکتەبی سیاسیی حەماس، لە ئیسرائیل دەکەنەوە، بەڵام هیچ هێرشێک لە ناوخۆی خاکی عێراقەوە بۆ سەر ئیسرائیل ئەنجام نادرێت".

زانیاریی زیاتر: بەگوتەی ئەو فەرماندەیە "ئێران و گرووپە چەکدارەکان بەرژەوەندییە دەریایی و وشکانییەکانی ئیسرائیل دەکەنە ئامانج و هێرشەکە لە پێشبینیی هەر کەسێک گەورەتر دەبێت". 

 

وێنە گەورەکە: چوارشەممەی ڕابردوو ئیسماعیل هەنییە سەرۆکی مەکتەبی سیاسی حەماس، لە تارانی پایتەختی ئێران کوژرا، ئێران و گرووپە چەکدارە هاوپەیمانەکانی هەڕەشەی تۆڵەسەندنەوە لە ئیسرائیل دەکەن.