دادگەی فیدراڵی لەسەر سکاڵایەکی سوودانی تایبەت بە یاسای بودجە کۆدەبێتەوە

ئاڤا نیوز

 

دادگەی فیدراڵی لەسەر سکاڵایەکی سەرۆکوەزیرانی عێراق کۆدەبێتەوە کە لەسەر ماددەیەکی یاسای بودجە تۆماریکردووە.

 

ڕاگەیێنراوی فەرمی: بەگوێرەی خشتەی کۆبوونەوەکانی دادگەی فیدراڵی، ڕۆژی دووشەممە (5ـی ئابی 2024) دادگەکە لەسەر سکاڵایەکی محەممەد شیاع سودانی، سەرۆکوەزیرانی عێراق کۆدەبێتەوە، کە تیایدا سەرۆکوەزیران داوایکردووە ماددەی 71ـی یاسای بودجەی گشتی بۆ ساڵەکانی 2023 و 2024 و 2025 بە نادەستوریی لەقەڵەم بدرێت.

 

وێنە گەورەکە: پەرلەمانی عێراق بە دەنگدانی بە ماددەی 71ـی یاسای بودجە، حکومەتی فیدراڵی پابەندکردووە بەوەی تا ڕۆژی 30ـی تشرینی دووەمی 2023 کۆتایی بە بەڕێوەبردنی سەرجەم پۆستە حکومییەکان بە وەکالەت بهێنێت.

 

زانیاریی زیاتر: 24ی حوزەیران دادگەی فیدراڵی لەسەر هەمان سکاڵا کۆبووەوە، بەڵام تاوتوێکردن و بڕیاردانی لەسەر ئەو بابەتە بۆ 5ـی ئاب دواخست.