مەترسی هەیە سەرکردەی گرووپە چەکدارییەکانی عێراق بكرێنە ئامانج

ئاڤا نیوز  

لیژنەی ئاسایش و بەرگریی لە پەرلەمانی عێراق هۆشداری دەدات، مەترسی هەیە هاوشێوەی کردنەئامانجی سەرۆکی مەکتەبی سیاسی حەماس لە تاران، سەرکردەی گرووپە چەکدارییەکانی عێراقیش لەلایەن ئەمریکا و ئیسرائیلەوە بە ئامانج بگیرێن.

لێدوانی فەرمی: محەممەد شەمەری، ئەندامی لیژنەی ئاسایش و بەرگری لە پەرلەمانی عێراق بە ئاڤا نیوزی گوت: بە ئامانجگرتنی سەرکردەکانی بەرەی مقاوەمە لە عێراق مەترسییەکی راستەقینەیە و بۆ ئەومەبەستەش دەبێت حکومەتی فیدڕاڵ هەموو هەنگاوێک بگرێتەبەر تا عێراق لەو جەنگە هەرێمیە دووربخاتەوە.

زانیاریی زیاتر: "هەنگاوێکی دیکەش کە پێویستە حکومەتی عێراق کاری لەسەر بکات بریتییە لە گفتوگۆ لەگەڵ لایەنی ئەمریکی و دانانی خشتەیەک بۆ کشانەوەی هێزەکانی هاوپەیمانان، تا چیتر سەروەری عێراق پێشێل نەکرێت". محەممەد شەمەری وای گوت.

باکگراوند: لەگەڵ کردنە ئامانجی ئیسماعیل هەنییە، سەرۆکی مەکتەبی سیاسی حەماس لە تاران، رۆژی چوارشەممە 31-7-2024 هێرشکرایەسەر  دوو یەکەی لیوای 47ی حەشدی شەعبی لە باشووری شاری بابل، لە ئەنجامیشدا ژمارەیەک کوژراو و برینداری لێکەوتەوە.