سەرچاوەیەک لە گرووپە چەکدارەکان: هێرشەكەی عەین ئەسەد پەیوەندی بە هەنییەوە نییە

ئاڤا نیوز

 

سەرچاوەیەك لە گرووپە چەکدارەکانی عێراق بە ئاڤا نیوزی گوت، هێرشەكەی بنكەی عەین ئەسەد پەیوەندی بە كوشتنی ئیسماعیل هەنییە سەرۆکی مەکتەبی سیاسی حەماسەوە نییە.

وێنە گەورەکە: لە 24 كاتژمێری ڕابردوودا دوو جار لەلایەن گرووپە چەكدارەكانەوە هێرشكرایە سەر بنكەی عەین ئەسەد و بەهۆیەوە پێنج سەربازی ئەمریكا برینداربوون، ئەمەش نیگەرانی ئەمریكای لێكەوتەوە.

لێدوانی فەرمی: سەرچاوەیەك لەنیو گرووپە چەکدارەکانی عێراق كە ئاگاداری هێرشەكانی سەر بنكەی عەین ئەسەدە بە ئاڤا نیوزی گوت:"هێرشەكانی عەین ئەسەد لە تۆڵەی كوشتنی ئیسماعیل هەنییەدا نییە و لە تۆڵەی ئەو هێرشەدایە كە هەفتەی ڕابروو ئەمریكا لە جورفولسەخەر ئەنجامیدا".

زانیاریی بەدەستهاتوو: لە هێرشەكەی ئەمریكا لە جورفولسەخەر كە بە درۆن ئەنجامدرا بەهۆیەوە چوار ئەندامی میلیشیاكان كوژران.

ئەوەی پێویستە بیزانیت: زانیارییە پشتڕاستكراوەكان دەڵێن، لە دوو هێرشی گروپە چەكدارەكاندا بۆ سەر عەین ئەسەد پێنج سەربازی ئەمریكا برینداربوون.

زانیاریی زیاتر: ئەو سەرچاوەیە بە ئاڤا نیوزی گوت:"هەر جارێك ئەمریكا هێرش بكاتە سەر بنكە و بارەگاكانی گرووپە چەكدارەكان ئێمەش هێرش دەكەینەوە سەر ئەمریكا". سەرچاوەكەی گرووپە میلیشیاكان وای گوت.