تورکیا بە مەرجی قەدەغەکردنی بڵاوکراوەکانی پەکەکە ڕێگەدەدات ئینستاگرام بکرێتەوە

ئاڤانیوز

 

دوای ئەوەی تورکیا بەکار‌هێنانی ئینستاگرامی ڕاگرت، یەکێک لە مەرجە سەرەکییەکانی  بۆ کردنەوەی پلاتفۆڕەکە سنووردارکردنی سەرجەم وێنە و بڵاوکراوەکانی 'پەکەکە'ـە هاوشێوەی "ڕێکخراوە تیرۆرستییەکانی جیهان".

 

وێنە گەورەکە: وەزارەتی پەیوەندییەکانی تورکیا لەگەڵ کۆمپانیای 'مێتا' کۆبوونەوە, بۆ گفتوگۆکردن لەسەر مەرجەکانی ئەنکەرە بۆ بەکارخستنەوەی تۆڕی کۆمەڵایەتی 'ئینستاگرام' لە تورکیا، ئەمەش دوای ئەوەی تورکیا وەک کاردانەوەیەک بەرامبەر بە لادانی وێنەی ئیسماعیل هەنیە، سەرۆکی کوژراوی مەکتەبی سیاسی حەماس، بەکارهێنانی ئینستاگرامی لە تورکیا ڕاگرت.

 

زانیاریی بەدەستهاتوو: لە کۆبوونەوەکەدا تورکیا داوای لە مێتا کردووە، سەرجەم وێنە و بڵاوکراوەکانی پەکەکە، یەپەگە، ئەندامانی سەر بە فەتحوڵڵا گولەن، هاوشێوەی "ڕێکخراوە تیرۆرستییەکانی جیهان" قەدەغە بکات، لە وەڵامدا بەرپرسانی ئینیستاگرام گوتویانە ئامادەن جگە لە پەکەکە، سانسۆر بخەنە سەر سەرجەم بڵاوکراوە و وێنەکانی "ڕێکخراوە تیرۆرستییە جیهانییەکانی" دیکە،  ئەم وەڵامەش بەدڵی بەرپرسانی تورکیا نەبووە  بەو هۆیەوە کۆبوونەوەکە بێ ئەنجام کۆتایی هاتووە.

 

ئەوەی لە بارەیەوە دەگوترێت: بەشێک لە نووسەرانی باکووری کوردستان دەڵێن: ئامانجی تورکیا 'کوردە' نەک هەنیە و هیچ کەسێکی دیکە.