چوار کەس لەسەر هێرشکردنە سەر بنکەی عەین ئەسەد دەستگیر دەکرێن

ئاڤا نیوز  

هێزە ئەمنییەکانی عێراق چوار کەس بە تۆمەتی هێرشکردنە سەر بنکەی ئاسمانیی عەین ئەسەد دەستگیر دەکەن، کە هێزەکانی ئەمریکاو ڕاوێژکارانی هاوپەیمانی نێودەوڵەتی تێدا نیشتەجێن.

وێنە گەورەکە: ئێوارەی ڕۆژی دووشەممە 5-8-2024، بە چەند مووشەکێک هێرشکرایە سەر بنکەی سەربازیی عەین ئەسەد و بەهۆیەوە پێنج سەربازی ئەمریکی برینداربوون.

زانیاریی بەدەستهاتوو: سەرچاوەیەکی ئەمنیی بە میدیای عێراقی ئاشكرایكردووە: "هێزە ئەمنییەکان ئەمڕۆ چوار کەسیان بە تۆمەتی هێرشکردنە سەر بنکەی ئاسمانیی عەین ئەسەد دەستگیر کردووە".

کاردانەوەکان: دوای ڕۆژێک لە هێرشەکە فەرماندەیی ئۆپەراسیۆنە هاوبەشەکانی عێراق ڕایگەیاند: هەموو ئەو کار و کردەوە بێباکانە ڕەتدەکەینەوە، کە بنکەکانی عێراق و نوێنەرایەتییە دیپلۆماسییەکان و شوێنی ڕاوێژکارانی هاوپەیمانی نێودەوڵەتی دەکەنە ئامانج.

لە لایەکی دیکەوە: گرووپی "الثوریون" کە خۆی وەک گرووپێکی سەر بە بەرەی مقاوەمەی ئیسلامی لە عێراق ناو دەبات، بەرپرسیارێتی خۆی لە هێرشە موشەکییەکەی سەر بنکەی عەین ئەسەد لە پارێزگای ئەنبار ڕاگەیاند.