مامەڵەکردن بە دراوی ئەلیکترۆنی لە سلێمانی قەدەغە دەکرێت

ئاڤا نیوز

به‌ڕێوه‌به‌رایه‌تیی ئاسایشی سلێمانی پێنج بڕیار بۆ بازاڕی ئاڵوگۆڕی دراو (بازاڕی دۆلاره‌كه‌) ده‌ر دەکات و لە یه‌كێک له‌ بڕیاره‌كانیشدا هاتووە، مامه‌ڵه‌كردن به ‌دراوی ئه‌لیكترۆنی به ‌هه‌موو شێوه‌یه‌ک قەدەغەیە.

چی ڕوودەدات: هۆبه‌ی چاودێری و ئاڵوگۆڕی دراو و شتومه‌كی ئاسایشی سلێمانی، ئاگاداری سه‌رجه‌م كۆمپانیاکان و نووسینگه‌، ده‌ستگێڕ و كاسبكاران ده‌كاته‌وه‌، نابێت جیاوازی بكرێت له‌نێوان دۆلاری چاپی كۆن و نوێ، كاتێك دراو وه‌رناگیرێت كه‌ (ساخته‌، دڕاو، ته‌واو ژاكاو) بێت.


لێدوانی فەرمی: جەبار گۆران، گوتەبێژی بازاڕی دۆلارەکەی سلێمانی بۆ ئاڤا میدیا: چەندین کۆبوونەوەمان لەسەر بابەتی جیاوازی نەکردنی نرخ لە نێوان دۆلاری شین و سپی یان چاپی کۆن نوێ کردووە کە بووەتە دیاردە، بەجۆرێک دۆلاری چاپی 2003 و کۆنتریش بە پارەی کەمتر لە بازاڕەکانی هەرێمی کوردستان مامەڵەی پێوە دەکرا، کە ئەمە لە هیچ شوێنێکی جیهاندا نییە.


گۆشەیەکی دیکە: بەپێی بڕیارەکە مامەڵەکردن بە دراوی ئەلیکترۆنییەوە بە هەموو شێوەیەک قەدەغەیە. ئاڤا نیوز زانیویەتی تەنها لە ساڵی ڕابردوودا بەهۆی مامەڵەکردن بە یەکێک لە دراوە دیجیتاڵییەکان 40 ملیۆن دۆلار زیان بەر هاونیشتمانیان کەوتووە.