تۆمەتبارانی هێرشەکەی سەر بنکەی عەین ئەسەد ئازاد دەکرێن

ئاڤا نیوز

 

دوای ئەوەی چوار کەس بە تۆمەتی هێرشکردنە سەر بنکەی سەربازیی عەین ئەسەد دەستگیر کران و دەرکەوت سەر بە کەتیبەکانی حیزبوڵڵای عێراقین، بەڵام دوای هەڕەشەکانی ئەو گرووپە چەکدارییە تۆمەتبارانی هێرشەکە ئازاد کراون. 

 

وێنە گەورەکە: ڕۆژی پێنجی ئەم مانگە بە مووشەک هێرشکرایەسەر بنکەی سەربازیی عەین ئەسەد لە ئەنبار کە هێزەکانی ئەمریکا و هاوپەیمانیی نێودەوڵەتی تێیدا جێگیر کراوە، لە ئەنجامیشدا پێنج سەربازی ئەمریکی برینداربوون.

 

زانیاریی بەدەستهاتوو: سەرچاوەیەکی ئەمنی بە ئاڤا نیوزی گوت، هێزە ئەمنییەکان دوای لێکۆڵینەوە و دەستبەسەرداگرتنی ئەو ئۆتۆمبێلەی هێرشە مووشەکییەکەی سەر بنکەی عەین ئەسەدی پێ کراوە، بۆیان دەرکەوت کە ئۆتۆمبێلەکە و ئەوانەی مووشەکەکانیان ئاراستەی بنکەی عەین ئەسەد کردووە، سەر بە حیزبوڵڵای عێراقین و لەلایەن هێزە ئەمنییەکانەوە دەستگیرکراون.

 

لەلایەکی دیکەوە: "دوای دەستگیرکردنی تۆمەتبارەکان و لەژێر هەڕەشەی حیزبوڵڵادا، تۆمەتبارانی هێرشەکە ئازادکراون، بەڵام بۆ دامرکاندنەوەی ناڕەزایەتییەکان و بەهۆی ئەوەی هێرشەکە لە سنووری دەسەڵاتی ئەواندا بووە، ئێستا هێزە ئەمنییەکان لێکۆڵینەوەیان لەگەڵ بەرپرسانی لیوای 57ـی حەشدی ئەلجغایفە دەستپێکردووە کە هێزێکی عەشایەری ئەنبارن"، سەرچاوەیەکی دیکەی ئەمنی بۆ ئاڤا نیوز وای گوت.

 

باکگراوند: 30ـی تەمموزی ئەمساڵ حیزبوڵڵای عێراقی بڵاوی کردەوە، لە ئەنجامی هێرشێکی درۆنی ئەمریکادا، چوار ئەندامیان لە بابل کوژراون لەکاتێکدا سەرقاڵى ئەزموونکردنى تەکنەلۆژیاى نوێی درۆنى چاودێری بوون، لە کاردانەوەی ئەو هێرشەشدا 5ـی ئەم مانگە بنکەی عەین ئەسەد بۆردوومان کرا.