سەرۆكوەزیران بارزانی: هەولێر و دوبەی ئاگاداری مەترسییەكی كارەساتبارن

ئاڤا نیوز

سەرۆكوەزیران بارزانی ڕایدەگەیێنێ، "دوبەی و هەولێر هەردووكیان لە ناوەندی هەسارەیەكی گەرمبوو دان، ئێمە بە تەواوی ئاگاداری مەترسییەكانی پشتگوێخستنی ڕاستییەكی كارەساتبارین".

 

وێنە گەورەكە: شارەزایان خێرایی گەرمبوونی زەوی بە مەترسییەكی گەورە لەسەر ژیان دەزانن، هۆكاری سەرەكیش گۆڕانی کەشوهەوا و چالاكییەكانی مرۆڤە، کە لەوەتەی شۆڕشی پیشەسازی سەریهەڵداوە بەشێوەیەكی بەرچاو زیادیان كردووە. 

لێدوانی فەرمی: سەرۆكوەزیران بارزانی لە گوتارێكدا لە لووتكەی حكومەتەكان لە دوبەی ڕایگەیاند: خواستێكی بەكۆمەڵ بۆ ڕووبەڕووبوونەوەی یەكێك لە گەورەترین ئاڵنگارییەكان هەیە كە ڕووبەڕوومان دەبێتەوە، ئەویش گۆڕانكارییە ژینگەییەكانە‌.

مەترسییە پێشبینیكراوەكان: "دوبەی و هەولێر هەردووكیان لە ناوەندی هەسارەیەكی گەرمبوو دان، ئێمە بەتەواوی ئاگاداری مەترسییەكانی پشتگوێخستنی ڕاستییەكی كارەساتبارین، زۆرێك لەو پابەندییانەی تاوەكو ئێستا نراون، دژی بەرژەوەندییە ئابوورییە كورتخایەنەكانن، گواستنەوە و گەیشتن بە سەرچاوەی وزەی خاوێن لەوانەیە لە ماوەیەكی كورتدا تێچووی زیاتر بێت، بەڵام پاشەكەوتی درێژخایەنی بۆ هەموومان بێهاوتایە"..

چارەسەر: پێویستیمان بە بووێریی، ڕاستگۆیی و دانایی هەیە بۆ ئەوەی بڕیارێكی قورس بدەین. ئەگەر لە ئەنجامدانی ئەو بڕیارە شكست بهێنین، ئەم بەشەی جیهان دەبێتە كورەیەك بەهۆیەوە بەشێكی فراوانی زەوی بۆ ژیان شیاو نابن، سەرچاوەكانی ئاو وشك دەبن و ئاسایشی خۆراك ڕووبەڕووی ئاڵنگارییەكی گەورە دەبێتەوە. لەوانەیە بەبیابانبوون، كۆچكردنی بەكۆمەڵ و داڕمانی ئابووری بەدوای خۆیدا بهێنێت.