ڕوونکردنەوە لەبارەی دووبارەبوونەوەی ناوی سیانی مووچەخۆران دەدرێت

ئاڤا نیوز

 

بەرپرسێكی وەزارەتی دارایی باس لە چارەسەری گرفتی ئەو مووچەخۆرانە دەكات كە ناوی سیانی و چوارییان وەک یەكە و دەڵێت، گرفت دروست نەبووە.

 

زانیاریی بەدەستهاتوو: بەپێی ئەو زانیارییانەی دەست ئاڤا نیوز كەوتوون، لەنێو فەرمانبەران و هێزەكانی پێشمەرگە ژمارەیەک مووچەخۆر هەن كە ناوی سێی و چوارییان وەک یەكە، ئەمەش لە ئەنجامی وردبینیكردنی ناوی مووچەخۆران تێبینی كراوە.

 

کاریگەری و لێکەوتەکان: ئەگەر هاتوو هەر مووچەخۆرێک ناوی سیانی لەگەڵ مووچەخۆرێكی دیكە وەک یەك بێت، ئەوا پشت بە ناوی چواریی و ناوی دایكیان دەبەسترێت، ئەگەر ئەمەشیان وەک یەکبوو پشت بە ڕۆژی لەدایكبوون و ژمارەی پسولەی خۆراكیان دەبەسترێت و چارەسەر دەكرێت. 

 

لێدوانی فەرمی: فەرمان زراری، بەڕێوەبەری گشتی لە دیوانی چاودێریی دارایی هەرێمی کوردستان بە ئاڤا نیوزی گوت: لێكۆڵینەوە و وردبینیكردن لە ناوی مووچەخۆران بەردەوامە و تاوەكو ئێستا گرفتێكی ئەوتۆ نەهاتووەتە پێش.

 

لەلایەكی دیكەوە: لیوا بەکر سدیق، بەڕێوەبەری ژمێریاری لە وەزارەتی پێشمەرگە بە ئاڤا نیوزی گوت، ئەگەر دۆخێکی وا هەبێت لەنێو هەر یەكەیەكی هێزی پێشمەرگە ئاساییە و چارەسەر دەكرێت، بەڵام هەر فەرماندەییەک ژمێریاریی تایبەت بەخۆی هەیە و بەرپرسە لە یەكەكەی خۆی و ئێمە داتا و زانیارییمان نییە.