بێمتمانەیی 50 ملیار دۆلاری وەبەرهێنان لە عێراق بەفیڕۆ دەدات

ئاڤا نیوز  

 

ئامارەکان دەریدەخەن لە عێراق زیاتر لە 50 ملیار دۆلار سەرمایەی کۆمپانیاکانی وەبەرهێنان لە 10 ساڵی ڕابردوودا لەدەست دراوە یاخود براوەتە دەرەوە، ئەمیش بەهۆی لاوازیی متمانەی وەبەرهێنەران و نەبوونی دڵنیایی بۆ پارەکانیان بووە.

 

ڕاگەیێنراوی فەرمی: مەنار ئەلعوبەیدی توێژەری ئابووری و سەرۆکی دەزگای "عێراقی ئایندە" ئاماژە بە دوایین ڕاپۆرتی 'پڕۆگرامی گەشەپێدانی نەتەوە یەکگرتووەکان' سەبارەت بە وەبەرهێنانی ڕاستەوخۆی بیانی لە عێراق دەکات و دەڵێت: "لە ساڵی 2023 دا زیاتر لە 5 ملیار دۆلاری وەبەرهێنەرانی بیانی لە عێراق چووەتە دەرەوە و لە ساڵی 2013 تا 2023ـش زیاتر لە 50 ملیار دۆلاری ئەمریکی بووە".

 

زانیاریی زیاتر: بە گوتەی عوبەیدی، وەبەرهێنانی بیانی گرنگییەکی زۆری هەیە بۆ عێراق لە هاندانی گەشەی ئابووری و هەلی کار و گواستنەوەی زانیاری، بەڵام هۆکاری سەرەکی دەرچوونی ئەم وەبەرهێنانانە لە عێراق بۆ "لەبارنەبوونی ژینگەی بازرگانی و نەبوونی یاسای ڕوون بۆ پاراستنی سەرمایەی وەبەرهێنەرە بیانییەکان" دەگەڕێنێتەوە.

 

هۆکارە زانراوەکان: بە تێڕوانینی ئەو توێژەرە، پڕۆگرامەکانی پاڵپشتیکردنی کەرتی تایبەت تەنیا دروشم بوون، ئەو ئامانجانەی لە پارێزگاکان لەسەر وەبەرهێنان دانراوە کە سەرنجی زیاتر لەسەر وەبەرهێنانی خانووبەرەیە، سەرنجیان نەخستووەتە سەر وەبەرهێنان لە بوارەکانی وزە و ژێرخانی ئابووری و پڕۆژەکانی بەرهەمهێنان.