عەرەب و تورکمانی کەرکووک: ڕێککەوتن نەکراوە و کۆبوونەوەی ئەنجوومەن ناکرێت

ئاڤا نیوز

ژمارەیەک پەرلەمانتار و ئەندامی ئەنجوومەنی پارێزگای کەرکووک لە هەردوو پێکهاتەی عەرەب و تورکمان، ڕەتیدەکەنەوە ئەمشەو کۆبوونەوەی ئەنجوومەنی پارێزگای کەرکووک بکرێت و دەڵێن: تا سبەی یەکشەممە بۆ ڕێککەوتن کات لەبەردەم لایەنەکاندا ماوە.

وێنە گەورەکە: مانگێک لەبەردەم ئەنجوومەنی پارێزگای کەرکووک بوو کە پۆستەکانی پارێزگار و سەرۆکی ئەنجوومەن یەکلا بکەنەوە، سبەی دوایین ڕۆژی وادەکەیە و تائێستا هیچ یەکێک لە پۆستەکان یەکلا نەکراونەتەوە.

ڕاگەیەنراوی فەرمی: موهەیمن حەمدانی، ئەندامی پەرلەمانی عێراق و محەممەد حافز، ئەندامی ئەنجوومەنی پارێزگای کەرکووک لە ڕاگەیەنراوێکی هاوبەشدا دەڵێن: بۆ پێکهێنانی حکومەتی خۆجێیی کەرکووک تائێستا هیچ ڕێککەوتنێک نییە و جگە لە نوێنەرانی هەڵبژێردراو، هیچ کەسێکی دیکە بۆی نییە وەک نوێنەری پێکهاتەی عەرەبی لە کەرکووک ڕێککەوتن و دانوستان بکات.

زانیاریی بەدەستهاتوو: سەرکردەکانی سوننە ئەندامانی پێکهاتەی عەرەبییان لە ئەنجوومەنی پارێزگای کەرکووک ئاگادارکردووەتەوە کە بەبێ کۆدەنگی عەرەب، نابێت بەشداری هیچ کۆبوونەوەیەکی ئەنجومەنی پارێزگا بکەن، بەپێچەوانەوە خۆیان لەبەرامبەر ناڕەزایی شەقامی عەرەبی و پاراستنی گیانیان بەرپرسیار دەبن.

لەلایەکی دیکەوە: سەوسەن شاکر، ئەندامی پێکهاتەی تورکمان لە ئەنجوومەنی پارێزگای کەرکووک ڕایگەیاند، ڕێککەوتن بۆ پێکهێنانی حکومەتی کەرکووک نەکراوە و هیچ وادەیەکیش بۆ کۆبوونەوەی ئەنجوومەن دیارینەکراوە، تورکمانیش پێداگرە لەسەر بەڕێوەبردنی خولی پۆستی پارێزگاری کەرکووک لەنێوان هەرسێ پێکهاتەکەدا.