لە نەخۆشخانەیەکی هەولێر نەشتەرگەرییەکی گەورە دەکرێت

ئاڤا نیوز

لە نەخۆشخانەیەکی حکومی هەولێر نەشتەرگەرییەکی گەورە بۆ بریندارێک دەکرێت و ڕووخساری ڕێک دەخرێتەوە.

چیرۆکی سەرەکی:  ماتۆرسوارێک خۆی بە ئۆتۆمبێلێکدا دەکێشێت، ئێسکەکانی دەموچاوی دەشکێن و ڕووخساری دەشێوێت، دەستبەجێ لە نەخۆشخانەی فریاکەوتنی ڕۆژئاوای هەولێر نەشتەرگەرییەکی گەورەی بۆ دەکرێت و چارەسەری پێویستی بۆ دەکرێت.

زانیاریی زیاتر: نەشتەرگەرییەکە لەلایەن تیمێکی پزیشکی کاتژمێر 1:00ی شەوی ڕابردوو دەستیپێکردووە و تاوەکو کاتژمێر 8:00ی بەیانی ئەمڕۆی خایاندووە.

لێدوانی فەرمی: د.سەعید توتمەیی، پسپۆڕی نەشتەرگەریی ڕووخسار و شەویلاگ کە سەرپەرشتیی نەشتەرگەرییەکەی کردووە بە ئاڤا نیوزی گوت:  ئەو کەسەی نەشتەرگەری بۆ کراوە ئێسکەکانی شەویلاگ و لووت و ڕووخساری شکابوون، بەڵام توانیمان ئێسکەکانی جێگیر بکەینەوە.

بۆچی گرنگە: ئەم جۆرە نەشتەرگەرییانە لێهاتوویی پزیشکانی  کورد و پێشکەوتنی کەرتی تەندروستی کوردستان دەردەخەن، هاندەریش دەبن بۆ ئەوەی هاونیشتمانیان زیاتر پشت بە کەرتی تەندروستی ناوخۆ ببەستن و پێویست نەکات ڕوو لە دەرەوەی وڵات بکەن.