ڕاکان جبووری: لە کەرکووک خیانەتمان لێکرا

ئاڤا نیوز

ڕاکان جبووری، ئەندامی ئەنجوومەنی پارێزگا لە پشکی هاوپەیمانی عەرەبی و سەرۆکی کاتی ئەنجوومەنی پارێزگای کەرکووک، لە پەیامێکی ڤیدیۆییدا  دەڵێت: "خیانەتمان لێکراوە و هەموو ڕێگە یاسایی و دادوەرییەکان بۆ گەڕانەوەی مافەکانمان دەگرینەبەر".

وێنە گەورەکە: شەوی ڕابردوو ئەنجوومەنی پارێزگای کەرکووک لە بەغدا بەبێ ئامادەبوونی سێ لایەن (پارتی دیموکراتی کوردستان، پێکهاتەی تورکمان و هاوپەیمانیی عەرەبی) کۆبووەوە و تێیدا رێبوار تەها لە پشكی یەكێتیی وەک پارێزگار  هەڵبژێردرا، بەمەش دوای حەوت ساڵ پۆستەکە گەڕایەوە لای کورد.

پەیامی فەرمی: ڕاکان جبووری، پارێزگاری بەوەکالەتی پێشووی کەرکووک لە پەیامەکەیدا دەڵێت، "بەشێک لە پێکهاتەی عەرەبی بەشدارییان لە کۆبوونەوەی شەوی ڕابردوودا کرد، ئەوان بۆ بەرژەوەندی کەسی خۆیان خیانەتیان لە دەنگەکانی هاووڵاتی عەرەبی شارەکەدا کرد و ڕێککەوتنی  ژێربەژێریان کرد."

زانیاریی زیاتر: ئەو مافانەی لە ساڵی 2003 ـەوە کاری بۆ دەکەین بۆ پێکهاتەی عەرەب، لەبەر چاو نەگیرا، لە ماوەی 8 مانگی ڕابردوو ئامادە نەبووین سازش لەسەر مافەکانمان بکەین، جەختیش دەکەینەوە کە بۆ بەدەستهێنانی مافەکانی عەرەب لە کەرکووک هەموو ڕێکارێکی یاسایی دەگرینەبەر. ڕاکان جبووری وایگوت.