گوتەبێژی یەکێتی: کاتی ئەوە هاتووە لەگەڵ پارتی لەپێناو کەرکووک پێکەوە کاربکەین

ئاڤا نیوز

گوتەبێژی یەکێتی ڕایدەگەیێنێت، "پارتی دۆست و هاوسەنگەری ئێمەیە و کاتی ئەوەی هاتووە لەپێناو شاری کەرکووک کار بکەین".

وێنە گەورەکە: شەوی ڕابردوو یەكێتی لەگەڵ سێ ئەندامی عەرەب و کۆتای کریستیان، بەبێ پارتی و بەرەی تورکمانی و هاوپەیمانی عەرەبی پۆستەکانی کەرکووکیان دابەشکرد و  ڕێبوار تەها لە پشکی یەکێتی بە پارێزگار هەڵبژێدرا، بەمەش دوای حەوت ساڵ پۆستەکە گەڕایەوە دەست کورد.

کۆنگرەی ڕۆژنامەوانی: سەعدی پیرە، گوتەبێژی یەكێتیی نیشتمانیی کوردستان ڕایگەیاند، "ململانێی دوێنێ کۆتاییهات، ئەمڕۆ زمانی گفتوگۆ و پێکەوەیی کار دەکات، کاتی ئەوە هاتووە خاڵێک بۆ ڕابردوو دابنێین و لەپێناو کەرکووک پێکەوە کار بکەین."

زانیاریی زیاتر: گوتەبێژی یەکێتی بە ئاماژەکردن بەوەی سەپاندنی بیروڕای حیزبییانە لە کەرکووک سەرکەوتوو نابێت، گوتیشی: "لە ماوەی حەوت ساڵی ڕابردوودا ئایدۆلۆژیای بەڕێوەبردنی کەرکووک تەعریبکردنی پارێزگاکە بوو".
 

باکگراوند: دوای هەشت مانگ لە هەڵبژاردنی  ئەنجوومەنی پارێزگاکان، شەوی ڕابردوو لە بەغدا ئەنجوومەنی پارێزگای کەرکووک بە ئامادەبوونی نۆ ئەندام کۆبووە و تێیدا ڕێبوار تەها لە پشکی یەکێتی وەک پارێزگار هەڵبژێردرا. کۆبوونەوەکەش لەلایەن شەش حەوت ئەندامی سێ  لایەن (پارتی دیموکراتی کوردستان، پێکهاتەی تورکمان و هاوپەیمانیی عەرەبی)  بایکۆت کرا.