ڕاوێژکارێکی سوودانی: دەرگای دادگەکان بۆ لایەنە ناڕازییەکانی کەرکووک کراوەتەوە

ئاڤا نیوز

 

ڕاوێژکاری سەرۆکوەزیرانی عێراق بۆ کاروباری پارێزگای کەرکووک بە لایەنە ناڕازییەکانی ئەنجوومەنی پارێزگاکە دەڵێت، دەرگەی دادگەکان کراوەیە بۆ ئەوەی سکاڵا تۆمار بکەن.

 

وێنە گەورەکە: کۆبوونەوەی ئەنجوومەنی پارێزگای کەرکووک و هەڵبژاردنی پارێزگار و سەرۆکی ئەنجوومەنەکە ناڕەزایی تورکمان و بەشێک لە لایەنە عەرەبییەکانی لێکەوتەوە دەرئەنجامەکانی بە "پێچەوانەی یاسا" ناو دەبەن.

 

لێدوانی فەرمی: عامر جبووری، ڕاوێژکاری سەرۆکوەزیرانی عێراق بۆ کاروباری پارێزگای کەرکووک بە ئاڤا نیوزی ڕاگەیاند: ئەو لایەنانەی ناڕازین لە بەڕێوەچوونی کۆبوونەوەی ئەنجوومەنی پارێزگای کەرکووک، دەرگای دادگەکان کراوەیە بۆ ئەوەی سکاڵا تۆمار بکەن، باشترە لەوەی بچن خۆپیشاندان بکەن و شەقامەکان دابخەن.

 

زانیاریی زیاتر: بە گوتەی ڕاوێژکارەکەی سەرۆکوەزیران، پارێزگاری کەرکووک گرنگ نییە سەر بە هەر پێکهاتەیەک بێت، بەڵام دەبێت بە یەک چاو سەیری هەمووان بکات و کاری لەپێشینەی پێشکەشکردنی خزمەتگوزاری بێت بە هەموو پێکهاتەکانی کەرکووک بەبێ جیاوازی.

 

باکگراوند: دوای هەشت مانگ لە هەڵبژاردنی  ئەنجوومەنی پارێزگاکان، شەوی ڕابردوو لە بەغدا ئەنجوومەنی پارێزگای کەرکووک بە ئامادەبوونی نۆ ئەندام لە کۆی 16 ئەندام کۆبووەوە، تێیدا پارێزگار و سەرۆکی  ئەنجوومەنی پارێزگا هەڵبژێردران، دوو نوێنەرەکەی بەرەی تورکمانی، دوو نوێنەرەکەی پارتی و سێ ئەندامی پێکهاتەی عەرەبیش بایکۆتی کۆبوونەوەکەیان کرد.