چوارچێوەی هەماهەنگی لە ماڵی عەبادی کۆدەبێتەوە

ئاڤا نیوز

چوارچێوەی هەماهەنگی شیعە، لە ماڵی حەیدەر عەبادی، سەرۆکی هاوپەیمانی نەسر  لە کۆبوونەوەدایە.

وێنە گەورەکە: سەرکردەکانی چوارچێوەی هەماهەنگی بەشێوەی خولی کۆدەبنەوە و بڕیار لەسەر پرسەکانی حکومەت و پەرلەمان و یاسا لەپێشینەکان دەدەن، لەم رۆژانەشدا یەکلاییکردنەوەی پۆستی سەرۆکی پەرلەمان کە پشکی سوننەکانە، زۆرترین سەرنجی شیعەکانی لەسەرە و دەیانەوێت ئەو پرسە بە خێرایی چارەسەر بکەن.

لێدوانی فەرمی: "ئێستا سەرکردەکانی چوارچێوەی هەماهەنگی لە ماڵی حەیدەر عەبادی، سەرۆکی هاوپەیمانی نەسر لە کۆبوونەوەدان"، سەرچاوەیەکی ئاگادار لەبارەی کۆبوونەوەکە وای بە ئاڤا نیوز گوت، بەبێ ئەوەی زانیاری زیاتر لەبارەی ناوەڕۆکی کۆبوونەوەکە بخاتەڕوو.

لە لایەکی دیکەوە: ئەمڕۆ نووری مالیکی، سەرۆکی هاوپەیمانی دەوڵەتی یاسا ڕایگەیاند: هەموو دەستپێشخەرییەکان بۆ یەکلاییکردنەوەی پۆستی سەرۆکی پەرلەمان بە ڕێککەوتنی ناوخۆیی سوننەکان شکستیانهێناوە، بۆیەش ئەوان پێداگرن لەسەر ئەوەی کە لەماوەیەکی نزیکی داهاتوودا کۆتایی بەو کێشەیە بهێنن.