چوارچێوەی هەماهەنگی مۆڵەتی هەفتەیەک دەداتە سوننەکان

ئاڤا نیوز  

ئەمشەو سەرکردەکانی چوارچێوەی هەماهەنگی لە ماڵی حەیدەر عەبادی، سەرۆکی هاوپەیمانی نەسر کۆبوونەوە، بڕیاریاندا هەفتەیەک مۆڵەت بدەنە سوننەکان تا لەسەر یەک کاندیدی هاوبەش بۆ پۆستی سەرۆکی پەرلەمان بگەنە ڕێککەوتن.

وێنە گەورەکە: چوارچێوەی هەماهەنگی بەشێوەی خولی کۆدەبنەوە و بڕیار لەسەر پرسەکانی حکومەت و پەرلەمان و یاسا لەپێشینەکان دەدەن، لە کۆبوونەوەی ئەمشەویشیاندا پرسی هەڵبژاردنی سەرۆکی پەرلەمانیان تاوتوێکردووە، بەڵام نەگەیشتوونەتە بڕیارێکی هاوبەش.

لێدوانی فەرمی: سەلام زووبەیدی، وتەبێژی هاوپەیمانی نەسر بە ئاڤا نیوزی گوت: لە کۆبوونەوەی ئەمشەوی سەرکردەکانی چوارچێوەی هەماهەنگیدا، گفتوگۆ لەسەر یەکلاییکردنەوەی کێشەی سەرۆکی پەرلەمان کرا و بڕیاردراوە هەفتەیەک مۆڵەت بە سوننەکان بدرێت تا لەسەر ئەو پرسە بگەنە ڕێککەوتن.

زانیاریی زیاتر: "چوارچێوەی هەماهەنگی هەمواری پەیڕەوی ناوخۆی پەرلەمان ڕەتدەکاتەوە، چونکە ئەوە دەرگای کێشەی تر دەکاتەوە، لە کۆبوونەوەکەشدا باس لە کاندیدی سێیەم نەکراوە لەپاڵ مەحموود مەشهەدانی و سالم عیساوی وەک لە هەندێک میدیا ئاماژەی پێکراوە. وە ئەگەر سوننەکان نەگەنە ڕێککەوتن ئەو پرسە لە چوارچێوەی رێکارە یاساییەکاندا یەکلایی دەکرێتەوە ".